Ukraina uchun 100 milliard dollarlik NATO jamg‘armasi 2024 yil iyuligacha tuzilishi mumkin. Bu haqda alyans bosh kotibi Yyens Stoltenberg ma’lum qildi.

Uning so‘zlariga ko‘ra, bu hafta ba’zi mamlakatlar ikkilanishiga qaramay, jamg‘arma yaratilishiga ishonchi komil, chunki uzoq muddatli yordam hozir va urushdan keyin mamlakatning tiklanishi uchun juda muhimdir.

«Urush tez orada tugashiga ishonsak va umid qilsak ham, kelajakdagi tajovuzni to‘xtatish uchun Ukrainani uzoq yillar davomida qo‘llab-quvvatlashimiz, uning mudofaasini qurishimiz kerak», dedi Stoltenberg.

Biroq u Kiyev ham ba’zi narsalarda yon bosishga majbur bo‘lishi mumkinligini inkor etmadi.

«Oxir-oqibat, Ukraina qanday murosaga tayyorligini o‘zi hal qilishi kerak, biz ularga muzokaralar stolida maqbul natijaga erishadigan holatda bo‘lish imkoniyatini berishimiz kerak», dedi NATO bosh kotibi.

U hozir Kiyevni yon bosishga undamayotganini va «Ukraina g‘alaba qozonganida» «haqiqiy tinchlikka» erishilishini qo‘shimcha qildi.

Shimoliy Atlantika alyansi Ukrainani qo‘llab-quvvatlash uchun 100 milliard dollarlik jamg‘arma yaratmoqchi. Yyens Stoltenberg so‘zlariga ko‘ra, g‘oya Ukrainaga yordam ko‘rsatish yukini alyansga a’zo davlatlar o‘rtasida adolatli taqsimlashni ta’minlashdan iborat.