Rossiya qurolli kuchlari bosh shtabi bosh boshqarmasining (sobiq «GRU») 29155-harbiy qismi xodimlari amerikalik diplomatlar, amaldorlar va razvedka xodimlariga «Havana sindromi» deb atalgan maxfiy qurol bilan ta’sir o‘tkazgan bo‘lishi mumkin. Bunday xulosaga The Insider nashri, Amerikaning CBS News telekanali «60 daqiqa» dasturi va Germaniyaning Der Spiegel haftalik nashri jurnalistlari kelgan. Ularning surishtiruvi natijalari 1 aprel, dushanba kuni e’lon qilindi.
Rossiya harbiy razvedkasi agentlarining safarlari haqidagi ma’lumotlarni dunyo turli mintaqalarida «Havana sindromi» holatlari bilan taqqoslab, jurnalistlar aniq bog‘liqlikni aniqladi. Surishtiruv shuni ko‘rsatdiki, amerikaliklarda «Havana sindromi» alomatlari xuddi shu davrlarda va 29155-qism xodimlari kelgan joylarda paydo bo‘lgan.
Xususan, bosh shtab bosh boshqarmasi agentlarining 2014 yilda Yevropa bo‘ylab harakatlari Frankfurt-Mayndagi Amerika konsulligi xodimlariga nisbatan «qator g‘alati hujumlar»ga to‘g‘ri keldi. 2016-2017 yillarda Xitoyda 29155-qism agentlari guruhi kelganidan so‘ng, amerikalik diplomatlar sog‘lig‘ida g‘alati muammolar haqida xabar berishni boshlagan. 2021 yilda 29155-qism xodimlari joylashgan Gurjistonda amerikalik diplomatning ismi oshkor etilmagan rafiqasiga Minora sindromi tashxisi qo‘yilgan. 2021 yilda Belgrad va Xanoyda ham «g‘alati tasodiflar» qayd etilgan.
Ikki jabrlanuvchi hujumlarda ishtirok etgani taxmin qilingan shaxslarni aniqladi
«Havana sindromi» alomatlari aniqlangan ikki ehtimoliy jabrlanuvchi fotosuratlar bo‘yicha hujumlarning ehtimoliy ishtirokchilarini topdi: ular Frankfurt-Maynda agent Yegor Gordiyenkoni sog‘lig‘i yomonlashmasdan oldin, Tbilisida - qism komandiri Andrey Averyanovning o‘g‘li Albert Averyanovni ko‘rgan.
Jurnalistlar, shuningdek, 29155-qismning asosiy a’zolaridan biri Ivan Terentev tomonidan «shahardagi harbiy (jangovar) operatsiyalar paytida halokatli bo‘lmagan akustik qurollarning potensial imkoniyatlari» bo‘yicha tadqiqotini tasdiqlovchi hujjatga ega ekani aytiladi.
Rossiya harbiy razvedkasining «akustik qurollar»dan foydalanishga aloqadorligi to‘g‘risida to‘g‘ridan to‘g‘ri dalillar mavjud bo‘lmasa-da, endi «Amerika rasmiylari «Havana sindromi»ga bo‘lgan munosabatini qayta ko‘rib chiqishi va voqealarni to‘liq tekshirishni boshlashi mumkin», - deya xulosa qilgan surishtiruv mualliflari.
