O‘zbekistonlik bokschilar WBA reytingida peshqadamlik qilmoqda 

Professional boks tayanch tashkilotlaridan biri bo‘lgan Jahon boks assotsiatsiyasi (WBA) iyul oyi yakuniga ko‘ra yangilangan reytinglarni (.pdf) e’lon qildi.

Unda o‘zbekistonlik ikki nafar bokschi peshqadamlik qilmoqda. Jumladan, Isroil Madrimov birinchi o‘rta vaznda (69,8 kg), Otabek Xolmatov yarim yengil vaznda (57,1 kg) birinchi o‘rinni egallab turibdi.

Shu bilan birga, ikkinchi o‘ta yengil vaznda (55,3 kg) Murodjon Ahmadaliyev, eng yengil vaznda (47,6 kg) Hasanboy Do‘smatov, yarim o‘rta vaznda (66,6 kg) Shahram G‘iyosov 2-o‘rinda bormoqda.

Yuqori ko‘rsatkichlarga ega o‘zbekistonlik bokschilardan birinchi yarim o‘rta vaznda (63,5 kg) Botir Ahmedov 4-o‘rinni, ikkinchi o‘rta vaznda (76,2 kg) Bektemir Meliqo‘ziyev 6-o‘rinni egallab turibdi.