Osiyo Boks Konfederatsiyasi (ASBC) 2024 yil yakunlariga ko‘ra, yilning eng yaxshilarini e’lon qildi. Quvonarlisi, ushbu ro‘yxatda 3 nafar vakillar ham bor.

Yil yakunlariga ko‘ra, Osiyoda o‘smir qizlar o‘rtasida yilning eng yaxshi bokschisi sovrini O‘zbekiston milliy jamoasi a’zosi Maftuna Yangiyevaga topshirildi.

22 yoshgacha bo‘lgan bokschilar orasida eng yaxshi ayol bokschi sovriniga esa 2024 yilda Osiyo chempionligini qo‘lga kiritgan Feruza Kazakova ega chiqdi.

Parij-2024 Olimpiada o‘yinlaridagi yuqori natijalarda o‘zining yuksak hissasini qo‘shgan O‘zbekiston milliy jamoasi bosh murabbiyi To‘lqin Qilichev – Osiyoda yilning eng yaxshi murabbiyi deya tan olindi.

Shuningdek, qit’aning boks bo‘yicha eng asosiy tashkiloti O‘zbekiston milliy jamoasiga Olimpiada-2024 natijalari uchun alohida minnatdorchilik bildirdi.

Qizig‘i, Parij-2024da oltin medal yutmagan Qozog‘iston boksi Osiyoda yil yakunlariga ko‘ra eng ko‘p sovringa ega chiqdi. Qozog‘istonlik Sag‘indiq Tog‘ambay – Osiyoning eng yaxshi bokschisi deb e’lon qilindi. Temirlan Mukatayev esa 22 yoshgacha bo‘lgan bokschilar orasida Osiyoda tengsiz deb topilgan bo‘lsa, Torexan Sobirxan Osiyoning eng yaxshi yosh boksichi deb e’lon qilindi. Qozog‘iston boks federatsiyasi esa 2024 yilda Osiyoning eng yaxshi milliy federatsiyasi deb topildi.

Eslatib o‘tamiz, boks bo‘yicha O‘zbekiston milliy jamoasi Parij-2024 Olimpiadasida 5ta oltin medal bilan umumjamoa hisobida 1-o‘rinni egalladi.