Birinchi o‘rta vaznda sobiq jahon chempioni Isroil Madrimovning 21 dekabr kuniga belgilangan jangi o‘tkazilmaydi. Bu haqda O‘zbekiston professional boks federatsiyasi xabar berdi.

Qayd qilinishicha, 29 yoshli Madrimov shu kuni Saudiya Arabistoni poytaxti Ar-Riyoz shahrida ukrainalik Sergey Bogachukka qarshi ringga chiqishi kerak edi. Ammo Isroilning betobligi, ya’ni o‘tkir bronxit bo‘lgani sababli jang bekor qilingan.

Ta’kidlanishicha, Madrimovning o‘rnini britaniyalik bokschi Ismael Salas egallaydi. Madrimov esa endi 22 fevral kuni WBC vaqtinchalik chempioni Verjil Ortisga qarshi kechadigan jangga tayyorgarlik ko‘radi.

Ma’lumot o‘rnida, Madrimov (10-1-1) oxirgi jangini 4 avgust kuni amerikalik Terens Kroufordga qarshi o‘tkazib, ochkolar hisobiga ko‘ra mag‘lub bo‘lgandi. 29 yoshli Bogachuk (24-2-0) esa so‘nggi jangida amerikalik Verjil Ortisga yutqazgan.