Самарқанд вилоятида ҳанузгача қоғозбозлик ва бюрократияни «яхши кўрадиган» ташкилотлар борлиги маълум бўлди

Жамият 19:28 / 05.11.2021 796

2021 йил 23 мартда президентнинг «Аҳоли ва тадбиркорлик субъектларига давлат хизматларидан фойдаланишда янада қулай шароитлар яратиш, бу борада бюрократик тўсиқларни қисқартириш бўйича қўшимча чора-тадбирлар тўғрисида»ги фармони эълон қилинди. Мазкур фармонга кўра, жорий йил 1 июндан бошлаб аҳоли ва тадбиркорлардан 18 турдаги ҳужжат ҳамда айрим маълумотномаларни талаб қилиш тартиби бекор қилинган.

Фармонда давлат органлари ва ташкилотлари жисмоний шахсларга давлат хизматларини кўрсатишда, ишга қабул қилиш жараёнида ва бошқа маъмурий тартиб-таомилларни амалга оширишда мазкур ҳужжат ва маълумотномаларни мустақил равишда, «Электрон ҳукумат» тизимида идоралараро интеграциялашув платформаси орқали сўраб олиши лозимлиги белгиланган.

Бироқ Самарқанд вилоятида қатор давлат идоралари ва ташкилотлари томонидан фуқаролардан ушбу ҳужжатларни талаб қилиш ҳолатлари ҳамон кузатилмоқда. Давлат хизматлари агентлигининг Самарқанд вилоят бошқармаси ахборот хизматининг маълум қилишича, жорий йилнинг 1 июнидан бошлаб ҳозиргача вилоятдаги Давлат хизматлари марказлари орқали фуқаролар томонидан жами 17 376 та ана шундай ҳужжат ва маълумотномалар олинган.

Хусусан, наркология диспансери ҳисобида туриш ёки турмаслиги тўғрисида жами 4 730 та маълумотнома берилган. Уларнинг:

  • 1416 таси ички ишлар органлари;
  • 1250 таси тиббиёт бирлашмалари ва муассасалари;
  • 534 таси мудофаа органлари;
  • 247 таси меҳнат ва бандлик органлари;
  • 216 таси маҳаллий ҳокимликлар;
  • 132 таси олий ва ўрта махсус таълим муассасалари;
  • 310 таси халқ таълими муассасалари томонидан сўралган.

Бундан ташқари, жами 1857 нафар фуқаронинг никоҳи қайд этилгани ёки никоҳда турмаслиги тўғрисидаги ёзма маълумотнома талаб қилиб олинган.

Давлат идоралари томонидан энг кўп сўралган маълумотномалар қаторига руҳий касалликлар диспансерида рўйхатда туриши ёки турмаслик (5127 та), судланмаганлик (4083 та), туғилганлик (1246 та) ҳамда фуқаронинг номида уй-жой бор ёки йўқлиги тўғрисидаги маълумотномаларни (1117 та) киритиш мумкин. Фармонда бундай турдаги маълумотномаларни фуқаролардан талаб қилиш тартиби бекор қилинган.

Давлат хизматлари агентлигининг Самарқанд вилоят бошқармаси томонидан бугунги кунга қадар қоғозбозликни давом эттириб келгани учун давлат ташкилотларига 107 та огоҳлантириш берилган. Бундан ташқари, вилоят ўсимликлар карантини ва ҳимояси бошқармаси, Ургут туман аҳоли бандлигига кўмаклашиш маркази, Ургут тумани халқ таълими бўлими, Ургут туман ирригация бўлими, Бюджетдан ташқари пенсия жамғармаси Ургут туман бўлими ходимлари, жами тўққиз киши Маъмурий жавобгарлик тўғрисидаги кодекснинг 2155-моддаси (Давлат хизматлари кўрсатиш соҳасидаги қонунчиликни бузиш) билан жавобгарликка тортилган.

Кўпроқ янгиликлар