Saylov kodeksining 44-moddasiga ko‘ra, saylov kuni va ovoz berishga bir kun qolganida tashviqotga yo‘l qo‘yilmaydi.

Prezident saylovi 2021 yil 24 oktyabrga belgilangani tufayli, shu kuni va 23 oktyabr kuni saylov bo‘yicha har qanday ko‘rinishdagi tashviqot olib borish taqiqlanadi.

Shuningdek, Saylov kodeksining 103-moddasiga binoan, 23 va 24 oktyabr kunlari jamoatchilik fikri so‘rovlari natijalarini, saylov natijalari prognozlarini, o‘tkazilayotgan saylov bilan bog‘liq boshqa tadqiqotlarni e'lon qilish (hammaga ma'lum qilish), shu jumladan axborot tarmoqlariga, shuningdek Internet jahon axborot tarmog‘iga joylashtirish taqiqlanadi.

Saylov to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi. Xususan, saylovoldi tashviqotini olib borish shartlari va tartibini nomzod, ishonchli vakil, siyosiy partiya vakili, mansabdor shaxs tomonidan buzish MJtKning 51-5-moddasiga asosan 7 baravaridan 10 baravarigacha miqdorda jarima solishga sabab bo‘ladi. Shuningdek, jamoatchilik fikri so‘rovlari natijalarini, saylov yoki referendum natijalari taxminlarini, shuningdek saylov yoki referendum bilan bog‘liq boshqa tadqiqotlarni chop etish (e'lon qilish) tartibini buzish MJtKning 51-9-moddasiga asosan, mansabdor shaxslarga BHMning 15 baravaridan 20 baravarigacha miqdorda jarima solishga sabab bo‘ladi.

Ma'lumot uchun, saylovoldi tashviqoti — saylov kampaniyasi davrida amalga oshiriladigan va saylovchilarni nomzodni yoki siyosiy partiyani yoqlab ovoz berishga undashga qaratilgan faoliyatdir.