«Zakovat» intellektual klubiga a'zo bo‘lish istagida www.zakovat.tv sayti orqali 13 mingdan ortiq arizalar kelib tushdi. Shundan 11 111 nafar talabgor yakka tartibda ariza topshirgan bo‘lsa, 1 932 kishi 322 ta jamoaga birlashgan holda ro‘yxatdan o‘tdi.
Hududiy turnirlar haqida
Talabgorlarning 72 foizi Qoraqalpog‘iston Respublikasi hamda viloyatlardan ro‘yxatdan o‘tganini hisobga olib, hududiy turnirlar tashkil etishga qaror qilindi. Shu orqali minglab insonlar uzoq masofalardan Toshkent shahriga kelib-ketishidagi ovoragarchiliklarning oldi olinishiga umid qilingan.
Tenglik bo‘lishi uchun hududiy turnirlarda ham xuddi Toshkentdagidek g‘olib jamoaga 100 mln so‘m pul mukofoti beriladi. Asosiy shartlaridan biri, bitta jamoa yoki shaxs faqat bitta hududiy turnirda qatnasha oladi. Masalan, Toshkent mintaqasida ishtirok etgan jamoa (shaxs) boshqa hududlardagi turnirlarga qo‘yilmaydi.
Hududiy turnirlar o‘tkazilish jadvali
Hududiy turnirlarni taxminan quyidagi muddatlarda o‘tkazish rejalashtirilmoqda:
- Samarqand viloyati – mart oyida;
- Qashqadaryo, Surxondaryo va Navoiy viloyatlari – aprel oyida;
- Qoraqalpog‘iston Respublikasi, Buxoro va Xorazm viloyatlari – may oyida;
- Andijon, Namangan va Farg‘ona viloyatlari – iyun oyida;
- Sirdaryo va Jizzax viloyatlari – iyul oyida.
Hududiy turnirlarning aniq sanalari, tartibi va shartlari qo‘shimcha ma'lum qilinadi. Shuningdek, tashkiliy jarayonlar sababli ayrim muddatlarga o‘zgartirishlar kiritilishi mumkin.
Klub a'zolari o‘rtasida so‘rovnoma
Ro‘yxatdan o‘tgan a'zolar uchun qaysi hududdagi kasting va turnirlarda qatnashish qulayligini aniqlash hamda shu bo‘yicha tashkiliy masalalarni hal qilish maqsadida kichik so‘rovnoma tashkil qilindi.
www.zakovat.tv saytida yakka tartibda va jamoa bo‘lib ro‘yxatdan o‘tgan ishtirokchilardan quyidagi havola orqali o‘tib, so‘rovnomani to‘ldirib berishlari iltimos qilinadi.
Intellektual kasting haqida
Yakka tartibda ro‘yxatdan o‘tgan talabgorlarni 6 kishilik jamoalarga ajratib chiqish maqsadida intellektual kasting tashkil etiladi. Kastingdan asosiy maqsad a'zolarni o‘tdi yoki o‘ta olmadi, deb saralash emas, balki shunchaki ularning birlamchi bilim darajalarini aniqlab olish bo‘ladi. Bu kelgusida ularni turli ligalarda va turnirlarda ishtirok etishi uchun ham ahamiyatga ega.
Boshqacha aytganda, kastingdan so‘ng qoniqarsiz natija qayd etgani uchun hech kim klub a'zoligidan chiqarib yuborilmaydi yoki turnirda qatnashish huquqini yo‘qotmaydi. Ammo yuqori natija qayd etganlarga kelgusi turnirlarda ko‘proq imkoniyat berilishi mumkin.
Intellektual kastingda jami 40ta savol beriladi. Ularning 30tasi faktga asoslangan savollar bo‘lsa, qolgan 10tasi mantiqiy savollar bo‘ladi. Faktga asoslangan savollarni o‘ylash uchun 20 soniya, mantiqiy savollarga esa 1 daqiqa vaqt beriladi.
Har bir ishtirokchi o‘ziga berilgan maxsus titul varag‘iga javoblarni yozishi talab etiladi.
Kasting natijalari 2 kun ichida ma'lum qilinadi. Ishtirokchilar o‘z natijasini www.zakovat.tv sayti orqali aniqlab olishlari mumkin bo‘ladi.
Jamoalar qanday shakllantiriladi?
Kastingdan so‘ng barcha ishtirokchilarning reytingi tuziladi. Ana shu reyting asosida 6 kishilik jamoalarga taqsimlab chiqiladi. Bunda taqsimlash reytingdagi ketma-ketlikka asoslangan holda amalga oshiriladi. Masalan, 1-o‘rindan 6-o‘ringacha bo‘lgan ishtirokchilar bitta jamoa, 7-12-o‘rinlardagi a'zolar keyingi jamoaga birlashtiriladi va h.k.
Yakka tartibda ro‘yxatdan o‘tganlar reytingdagi o‘rnidan qat'i nazar o‘zaro kelishgan holda o‘z tashabbusi bilan bir jamoaga birlasha olishmaydi.
Ishtirokchilar qaysi jamoaga tushgani va jamoadoshlari ro‘yxati bilan www.zakovat.tv sayti orqali tanishishlari mumkin bo‘ladi.
Toshkent mintaqasi uchun intellektual kasting
Toshkent shahri hamda Toshkent viloyati uchun intellektual kasting 28 fevral kuni soat 17:00da Humo Arena saroyida bo‘lib o‘tadi. Saroyga kirish soat 15:00dan boshlanadi.
Bunda ro‘yxatdan o‘tish jarayonida yashash joyi sifatida ikkita hududdan birini – Toshkent shahri hamda Toshkent viloyatini tanlagan ishtirokchilarning telefon raqamiga SMS tarzda tadbir uchun elektron taklifnoma yuboriladi. Shuningdek, www.zakovat.tv sayti orqali ham tegishli shaxsiy ma'lumotlarini kiritgan holda elektron taklifnomani yuklab olish imkoni yaratiladi.
Intellektual kasting faqat yakka tartibda ro‘yxatdan o‘tganlar uchun o‘tkaziladi. Jamoa bo‘lib ro‘yxatdan o‘tganlar kastingdan o‘tmaydi, ammo ular o‘sha kuni mehmon sifatida ishtirok etishi mumkin.
Intellektual kastingga turli sabablarga ko‘ra kela olmagan ishtirokchilar breyn-ring turnirida qatnashish huquqini qo‘ldan boy beradi. Kasting qayta tashkil qilinmaydi.
Toshkentda tahsil oluvchi talabalarning ishtiroki
Ayrim talabalar garchi Toshkentdagi oliy ta'lim muassasalarida tahsil olishsa ham, lekin ro‘yxatdan o‘tayotgan paytda yashash manzili sifatida o‘zlarining doimiy ro‘yxatdan o‘tgan manzilini (propiska) belgilashgan. Bunday vaziyatda ular qaysi hududdagi kasting va turnirda ishtirok etadi, degan savollar kelib tushmoqda.
Toshkent shahri hamda Toshkent viloyatida tahsil olayotgan talabalarga garchi boshqa hududlarni belgilagan bo‘lsa ham, 28 fevral kuni Toshkent shahridagi Humo Arena saroyida bo‘lib o‘tadigan kastingda qatnashish huquqi beriladi. Buning uchun ular o‘sha kuni soat 15:00dan boshlab fuqarolik pasporti bilan birga Humo Arena saroyiga kelishlari va o‘sha yerdagi texnik yordam ko‘rsatish xodimlariga murojaat qilishlari kerak. Texnik xodimlar talaba haqiqatan saytda ro‘yxatdan o‘tganini tekshirib, o‘sha yerning o‘zida tadbirga kirish uchun taklifnoma berishadi.
Ro‘yxatdan o‘tishga ulgurmaganlar uchun
www.zakovat.tv sayti orqali belgilangan muddatda ro‘yxatdan o‘tishga ulgurmagan shaxslar hozircha Toshkent mintaqasida bo‘lib o‘tadigan tadbirlarda ishtirok eta olishmaydi. Ammo ular «Zakovat» intellektual klubi tomonidan kelgusida o‘tkaziladigan boshqa tadbirlarda qatnashishlari mumkin.
