Тошкентда илк бор дзюдо бўйича «Катта Дубулға» турнири ўтказилади

Ўзбекистон 11:32 / 14.01.2021 2375

Халқаро дзюдо федерацияси (IJF) Токио Олимпиадасигача бўлган мусобақалар тақвимини эълон қилди. Унда илк бор Тошкентда «Катта Дубулға» турнири ўтказилиши режалаштирилган. Бунгача ҳар йили Тошкент шаҳрида Гран-при турнири ўтказиб келинаётган эди. 

Жорий йилнинг 5-7 март кунлари Тошкент шаҳри дзюдо бўйича «Катта Дубулға» туркумига кирувчи йирик мусобақага мезбонлик қилади. Илк бор ўтказилаётган ушбу турнир Токио Олимпиадаси учун катта рейтинг очколарини тақдим қилиши билан аҳамиятлидир.

Ўзбекистон дзюдо федерацияси маълумотига кўра, бугун Миллий олимпия қўмитасида ушбу мусобақага тайёргарлик бўйича йиғилиш бўлиб ўтган.

«Мусобақанинг нуфузи баланд бўлгани боис унга дунёнинг 50 дан ортиқ мамлакатидан 1000 нафарга яқин меҳмон келиши кутилмоқда. Табиийки, эпидемиологик даврда барча меҳмонларнинг хавфсизлиги ва саломатлигини таъминлаш катта масъулият талаб этади. Йиғилишда пойтахтимизга ташриф буюрадиган меҳмонлар учун Тошкент халқаро аэропортида талаб этиладиган COVID-19 тестини топшириш, транспорт-логистика масалалари, меҳмонхоналарга жойлаштириш учун барча қулайликларни яратиш каби мавзулар кун тартибининг асосий масалалари бўлди», — дейилади федерация хабарида.

Дзюдо бўйича мавсумни 11-13 январ кунлари Қатарда ўтган «Мастерс» турнири бошлаб берди. Унда иштирок этган ўзбекистонлик спортчилар битта бронза медали билан турнирни 16-ўринда якунлади.

Кўпроқ янгиликлар