«Lukoyl» O‘zbekistonning uch viloyatida bolalar bog‘chalari quradi

«Lukoil Uzbekistan Operating Company» tomonidan Buxoro, Qashqadaryo va Toshkent viloyatlarida 550 o‘ringa mo‘ljallangan bolalar bog‘chalari qurish rejalashtirilgan.

Neft-gaz qazib chiqarish va uning eksporti bilan shug‘ullanuvchi xorijiy kompaniya tomonidan 3ta viloyatda maktabgacha ta'lim muassasalarini tashkil etish reja qilingan. Loyiha doirasida qurilish ishlariga keyingi ikki yil davomida 12 million dollar mablag‘ ajratiladi. Bu haqda 2021-2023 yillarga mo‘ljallangan investitsiya dasturida ma'lum qilindi.

Shuningdek, «Lukoil Uzbekistan Operating Company» tomonidan Qandim guruhi konlarida gazni qayta ishlash zavodi qurilishi, Hauzak va Shodi konlarini o‘zlashtirish hamda Qo‘ng‘irot uchastkasida mahsulot taqsimotiga oid bitim asosida geologiya-qidiruv ishlarini olib borish uchun 2046 yilgacha bo‘lgan muddatda 6 milliard 250 million dollar, Hisor investitsiya bloki va Ustyurt mintaqasi bo‘ylab mahsulot taqsimotiga oid bitimga asosan konlarni o‘zlashtirish va uglevodorodlarni qazib olish ishlari uchun 2042 yilgacha 1 milliard 795 million dollar investitsiya kiritilishi belgilangan.

Ma'lumot uchun, «Lukoil Uzbekistan Operating Company» O‘zbekistonda 2004 yilda Qandim-Chauzak-Shodi-Qo‘ng‘irot loyihasi imzolangandan beri faoliyat yuritib kelyapti.

#bog‘cha #Lukoyl