Moliya vazirligi qishloq xo‘jaligi mahsulotlarini ishlab chiqaruvchilar (fermer xo‘jaliklari) tomonidan to‘lanadigan soliqlar 2020 yilda qanday o‘zgargani haqida tushuntirish berdi.
Qayd etilishicha, 2020 yil 1 yanvardan yagona yer solig‘i bekor qilindi, shu bilan birga, qishloq xo‘jaligi mahsulot ishlab chiqaruvchilari umumbelgilangan soliqlar va aylanmadan soliq to‘lashga o‘tkazildi (agar yillik aylanmasi 1 mlrd. so‘mdan kam bo‘lsa).
2019 yilda qanday edi
Yagona yer solig‘i (qishloq xo‘jaligi ekinlarining normativ qiymatidan kelib chiqib 0,95 foiz miqdorda hisoblab chiqariladi);
Qo‘shilgan qiymat solig‘i (2019 yil 1 oktyabrdan).
2020 yilda qanday bo‘ldi
Qishloq xo‘jaligi mahsulot ishlab chiqaruvchilari umumbelgilangan soliqlar yoki aylanmadan soliq to‘lashdan qat'iy nazar:
Yer solig‘i (qishloq xo‘jaligi ekinlarining normativ qiymatidan kelib chiqib amalga oshiriladi. Soliq stavkasi 0,95 foiz. Soliq solinmaydigan yerlar:
yuridik shaxslar, yer uchastkasining qaysi qismida tomchilatib sug‘orishdan foydalanilayotgan bo‘lsa, o‘sha qismida tomchilatib sug‘orish tizimi joriy qilingan oydan boshlab besh yil muddatga;
qishloq xo‘jaligi maqsadlari uchun yangi o‘zlashtirilayotgan yerlar, ularni o‘zlashtirish ishlari bajariladigan davrda va ular o‘zlashtirilgan vaqtdan e'tiboran besh yil mobaynida;
melioratsiya ishlari amalga oshirilayotgan mavjud sug‘oriladigan yerlar, ishlar boshlanganidan e'tiboran besh yil muddatga;
yangi barpo etilayotgan bog‘lar, tokzorlar va tutzorlar egallagan yerlar, daraxtlarning qator oralaridan qishloq xo‘jaligi ekinlarini ekish uchun foydalanilishidan qat'i nazar, uch yil muddatga.
Mol-mulk solig‘i (qishloq xo‘jaligi mahsulotlarini yetishtirish va saqlash uchun qishloq xo‘jaligi korxonalari balansida bo‘lgan mol-mulkiga soliq solinmaydi);
Suv resurslaridan foydalanganlik uchun soliq (qishloq xo‘jaligiga mo‘ljallangan sho‘rlangan yerlarni yuvish uchun foydalaniladigan, suvdan foydalanish va suv iste'moli sohasidagi vakolatli organ tomonidan tasdiqlangan sho‘rlarni yuvish normalari doirasidagi suv resurslariga soliq solinmaydi).
Umumbelgilangan soliqlar
Qo‘shilgan qiymat solig‘i;
Foyda solig‘i (Soliq kodeksining 57-moddasida nazarda tutilgan talablarga javob beradigan qishloq xo‘jaligi mahsuloti ishlab chiqaruvchilari va baliq xo‘jaligi korxonalari uchun ular tomonidan o‘zi ishlab chiqargan qishloq xo‘jaligi mahsulotlari realizatsiyasidan olgan foydasi bo‘yicha belgilangan 0 foizli stavka bo‘yicha)
Aylanmadan olinadigan soliq (agar yillik aylanmasi 1 mlrd so‘mdan kam bo‘lsa).
Soliq stavkasi 4 foiz. Aylanmadan olinadigan soliq sug‘oriladigan qishloq xo‘jaligi yerlari maydoni 50 gektar va undan ko‘p bo‘lgan qishloq xo‘jaligi tovar ishlab chiqaruvchilariga tatbiq qilinmaydi.
