Вадим Абрамов — Ўзбекистон миллий жамоасининг янги бош мураббийи

Спорт 17:36 / 23.09.2019 56684

«Бунёдкор» клуби устози Вадим Абрамов Ўзбекистон миллий жамоаси бош мураббийи этиб тайинланади. Бу ҳақда Ўзбекистон футбол ассоциацияси маълум қилди.

«Миллий терма жамоамизда бундан буён Вадим Абрамов бош мураббий сифатида фаолият олиб боради. ЎФА Мураббийлар кенгаши юртимиздаги таниқли мутахассислардан бири саналадиган Вадим Карленович номзодини маъқуллади.

Биласиз, Ўзбекистон миллий терма жамоаси ушбу мутахассис бошчилигида Қатар яшил майдонларида ўтган Осиё кубоги-2011да қитъа биринчиликларидаги ўзининг энг яхши натижасини қайд этган. Шунингдек, миллий терма жамоамизнинг ўша ёрқин ўйинлари мухлисларимизнинг ҳали ҳам ёдида.

Вадим Абрамовга мураббийлар штабида Ўзбекистон миллий терма жамоаси сафида узоқ йиллар муваффақиятли ўйин кўрсатган ва эндиликда мураббийлик соҳасида ҳам қисқа вақт ичида тез ўсишга эришиб, мухлислар ишончини қозонишга улгурган Тимур Кападзе ёрдам беради.

Шунингдек, ўзбек футболи мухлисларига яхши таниш бўлган австралиялик тажрибали мутахассис Мирко Йеличич футболчиларнинг жисмоний тайёргарлиги билан шуғулланади. Дарвозабонлар билан эса Денис Иванков ишлашда давом этади», – дейилади расмий ахборотда.

ЎФА хабарида 57 ёшли мутахассиснинг «Бунёдкор» бош мураббийи лавозимидаги келгуси фаолияти бўйича маълумот берилмаган. Ўз навбатида клуб ҳам ҳозирча бу ҳақда баёнот бергани йўқ.

Абрамов «қалдирғочлар»ни шу йилнинг январида қабул қилиб олган, у ОКМК бошқарувига ўтган Миржалол Қосимовнинг ўрнини эгаллаганди. Жамоа Суперлига якунланишига 6та тур қолган бир вақтда 3-ўринда бормоқда. Иккинчи поғонадаги «Локомотив» билан орадаги фарқ 3 очкога тенг.

Ўзбекистон Лига кубогидаги иштирокини якунлаган «Бунёдкор» 26 сентябрь куни Ўзбекистон кубогининг битта ўйиндан иборат ярим финали доирасида Олмалиқда ОКМК меҳмони бўлади.

Эслатиб ўтамиз, бугун миллий жамоани бир йилдан ошиқроқ вақт бошқариб келган аргентиналик Эктор Купер билан шартнома икки томоннинг келишуви асосида бекор қилингани ҳақида хабар берилган эди.

Ўзбекистон миллий жамоаси навбатдаги ўйинини ЖЧ-2022 саралаши доирасида 10 октябрь куни Тошкентда Яманга қарши ўтказади, 15 октябрда эса сафарда Сингапурга қарши ўйнайди.

Кўпроқ янгиликлар