AQShda uzunligi 70 metrga yaqin keladigan avtomobillar yuvish shoxobchasi (avtomoyka) quriladi. Shoxobcha egalari avtomobillar yuviladigan dunyodagi eng uzun shoxobchani qurib, bu natijani Ginness rekordlar kitobiga kiritishmoqchi. Bu haqda KHOU telekanali xabar bermoqda.  

Shoxobcha binosi Texasda quriladi. Uning ichida avtomobillar maxsus konveyer tasmasida harakatlanadi. Kompaniya xodimi telekanalga bergan intervyusida, shoxobchada mijozlarga to‘liq avtomatlashtirilgan yuvishdan qo‘lda yuvishgacha bo‘lgan  barcha xizmatlar taqdim qilinishini ta'kidlab o‘tgan.

Bu shoxobchada bir vaqtning o‘zida nechta mashinaga xizmat ko‘rsatilishi ma'lum qilinmagan. Biroq agar bir mashinaning o‘rtacha uzunligi 4,5 metrga yaqinni tashkil qilishi faraz qilinsa, unda shoxobchada bir vaqtning o‘zida 15 ta mashina joylashishi mumkin.   

Bugungi kunda dunyodagi eng uzun avtomobillar yuvish shoxobchasi Germaniyaning Shtutgart shahrida joylashgan bo‘lib, u bir soatda 400 mashinaga xizmat ko‘rsatishga qodir. Bu ikki qavatli shoxobchada yiliga 500 mingdan ko‘proq mashina "yuvintiriladi". Xizmatlar narxi 6 yevrodan 20 yevrogacha turadi.