Buyuk Britaniyaning Coys kim oshdi savdo uyi atigi 80 mil (128km) yurgan Mercedes-Benz SL 500 rodsterini savdoga qo‘ydi. U R129 kuzovida ishlab chiqilgan. Qizig‘i shundaki, 1996 yilda ishlab chiqilgan mashina egasining kalitni yo‘qotib qo‘ygani sababli 21 yil turgan, deb yozadi CarThrottle. 

Kim oshdi savdo uyi rahbari Kris Rutlej «Mersedes»ning boshidan kechirganlarini hikoya qilib bergan. Uning aytishicha, rodster qandaydir badavlat qizga hadya qilingan, u esa mashina kalitini yo‘qotib qo‘ygach, avtomobilni shunchaki uyida qoldirgan. Mashina esa 20 yildan ortiq vaqt e'tiborsiz qolgan. 

Rutlejning qayd etishicha, agar mashina o‘tgan davr mobaynida foydalanilganda hozirda 5-7 ming funt sterling (6-9 ming dollar) turishi mumkin edi. Biroq avtomobil yaxshi holatda bo‘lgani sababli uning ehtimoliy qiymati 45-55 ming funt (55-68 ming dollar) atrofida.

Ma'lum bo‘lishicha, mashinaning asl kalitlari topilmagan va yangi kalitlar to‘plami bilan sotuvga chiqarilgan.