Америкалик конгрессмен Трампга импичмент эълон қилиш бўйича даъво киритишга ваъда берди

АҚШ Конгресси аъзоси Эл Грин 30 кун ичида президент Доналд Трамп импичменти бўйича даъво киритишини маълум қилди. Бу ҳақда у амалдаги президент сиёсатидан норози одамлар тўпланган Вашингтондаги митингда таъкидлаб ўтди.

«Бизга бу сафар уни айбдор деб тан оладиган Сенат керак. Мен тушунаман — у Голиаф. У армиядаги генералларни назорат қилади. У Адлия вазирлигини назорат қилади. У Республикачилар партиясини назорат қилади. Аммо дўстларим… ҳар бир Голиафнинг ўз Довуди бор», — дейди Грин норозилик акциясида. Конгрессмен Трамп ўзи эгаллаб турган лавозимга лойиқ эмаслигини қўшимча қилди.

Грин олдин ҳам Доналд Трампга нисбатан импичмент ташаббусини ваъда қилганди. Хусусан, у бу ҳақида 5 феврал куни, президент Ғазо секторини АҚШ назорати остига олиш таклифини берганидан кейин, Вакиллар палатаси минбаридан туриб гапирганди.

Эслатиб ўтамиз, Доналд Трампга нисбатан биринчи президентлик муддатида ҳам импичмент жараёнлари бошланган эди. Биринчи импичмент 2019 йил декабрида эълон қилинган. Ўшанда конгрессменлар Трампни ҳокимиятни суиистеъмол қилиш ва Конгресс ўтказган терговга тўсқинлик қилишда айблаган. Бироқ Сенат импичментга қарши овоз берган.

2021 йил январда эса АҚШ Сенати Доналд Трампни Капитолийга ҳужум уюштирилиши туфайли бошланган импичмент жараёнида қоралаш учун зарур бўлган овозни йиға олмаганди.