Brent нефти нархи 2021 йилдан бери энг паст даражага тушди

АҚШ президенти Доналд Трамп томонидан киритилган кенг қамровли импорт божлари ва Хитойнинг жавоб чоралари фонида Brent маркали нефт нархи 2021 йилдан бери энг паст даражага тушди. Лондоннинг ICE Futures биржасида 4 апрел, жума куни Brent маркасидаги нефтнинг июн фючерслари нархи 8,02 фоизга тушиб кетди ва бир баррел учун камида 64,35 долларни ташкил қилди. Охирги марта нефт 3,5 йил аввал — 2021 йилнинг 23 августида 65 доллардан арзонроқ бўлган эди. 

Сўнгги икки савдо сессиясида нефт нархи 13,59 фоизга арзонлашган. Бу пасайиш Трамп 2 апрел куни 183 мамлакат товарларига янги тарифларни эълон қилганидан кейин бошланди. Улар турли мамлакатлар учун 10 фоиздан 50 фоизгача бўлади. Трамп кўрилаётган чора-тадбирларни сўнгги йилларда «яқин ва узоқ давлатлар, дўстлар ва душманлар томонидан талон-торож қилинган, зўрланган ва ўғирланган» АҚШ иқтисодиётини тиклаш зарурати билан изоҳлади.

Нефт бозорининг пасайишига ОПEК+'нинг май ойида хомашё қазиб олишни олдиндан режалаштирилган 135 минг баррел ўрнига кунига 411 минг баррелга ошириш режалари ҳам таъсир кўрсатди. 4 апрел куни Хитой Қўшма Штатлардан келадиган барча маҳсулотларга 34 фоизлик жавоб тарифларини жорий қилиши ҳақидаги хабар нефт нархи пасайишини тезлаштирди. Ушбу чора-тадбирлар 10 апрелдан кучга киради.