Руминияда 30 йил давомида оддий буюм сифатида қараб келинган тош 1 млн долларлик қаҳрабо бўлиб чиқди

Руминияда ўнлаб йиллар давомида оддий тош сифатида ишлатиб келинган тош энди дунёдаги энг қиммат қаҳраболаридан бири ҳисобланмоқда. Euronewsʼнинг ёзишича, унинг қиймати 1 миллион доллардан ошиши мумкин.

Оғирлиги 3,5 килограммга етадиган тош 1960 йилларда кекса аёл томонидан Руминия жануби-шарқидаги дарёдан топилган. Йиллар давомида ундан уй хўжалиги буюми сифатида фойдаланиб келишган ва ҳеч ким унинг асл қийматини англамаган.

1991 йилда аёл вафотидан кейин уйни мерос сифатида олган унинг қариндоши тошнинг ноодатий кўринишига эътибор қаратган. У тошни маҳаллий ҳукуматга сотган. Полшадаги Краков тарих музейи томонидан ўтказилган экспертиза ушбу тош «румэнит» номли шу вақтгача аниқланган энг катта шикастланмаган қаҳрабо бўлаги эканини аниқлаган.

Румэнит — Руминияда учрайдиган қаҳрабонинг ноёб тури бўлиб, қимматбаҳо тошлар бозорида талабгир. Экспертларнинг баҳолашича, у қадимги дарахтлар қатронининг қотишидан ҳосил бўлади. 2022 йилдан бери ушбу топилма Бузэу музейида сақланмоқда.