Британияликлар тўлиқ офисга қайтишдан кўра ишдан бўшашни афзал кўрмоқда — тадқиқот

Буюк Британияда ишлайдиган мутахассисларнинг деярли ярми (48 фоизи) агар иш берувчи уларни ҳафта давомида тўлиқ офисга қайтишга мажбур қилса, ишдан бўшаш аризасини ёзишга тайёр. Бу ҳақда Hays рекрутинг компанияси тадқиқотларига таяниб, The Guardian хабар берди. 

Қайд этилишича, аёл мутахассислар орасида бу кўрсаткич янада юқори — 58 фоиз. Сўров 8 мингдан ортиқ ходимга эга компаниялар орасида ўтказилган.

Ходимларнинг 75 фоизи гибрид иш жадвалини, яъни ҳафтанинг фақат бир қисмини офисда ўтказишни маъқул кўради. Ҳозирда бу каби иш жадвалидан компанияларнинг 77 фоизи фойдаланмоқда. Энг кенг тарқалган вариант — ҳафтада 3 кун офисда ишлаш бўлиб, компанияларнинг 25 фоизи уни жорий этган. 

Мутахассисларнинг 77 фоизи уйда кўпроқ ишлашни хоҳлашининг асосий сабаби — иш жойига боришдаги транспорт харажатларидир. 

Иш берувчиларнинг 66 фоизи ходимларни тўлиқ офисга қайтишга мажбур қилиш салбий оқибатларга олиб келишидан хавотирда. Шу билан бирга, компанияларнинг 52 фоизи офисда ишлайдиган ва уйдан ишлайдиганларнинг самарадорлиги бир хил эканини маълум қилган. Шунга қарамай, сўровда иштирок этган компанияларнинг 25 фоизи ходимларни офисда тез-тез бўлишга чақирган.

Hays компаниясининг операцион директори Пэм Линдси-Даннга кўра, иш берувчилар офисга мажбурий қайтишни жорий қилса, энг яхши мутахассисларни йўқотиш хавфи борлигини тушунишлари зарур.