«Натижа бор» - Путин Россия-АҚШ музокаралари ҳақида

Россия президенти Владимир Путин 18 февраль куни Саудия Арабистони пойтахти Ар-Риёзда бўлиб ўтган Россия-Америка музокаралари натижаларини «юқори» баҳолашини айтди. Унинг сўзларидан «Интерфакс» иқтибос келтирди.

«Ҳа, менга [музокаралар натижаларидан] хабар беришди. Мен уларни юқори баҳолайман. Натижа бор», деди Путин.

У, шунингдек, Москва ва Вашингтон «дипломатик ваколатхоналарнинг нормал фаолиятини тиклашга келишиб олганини» тасдиқлади. Бу ҳақда бир кун аввал АҚШ Давлат котиби Марко Рубио маълум қилган эди. Россия президентининг сўзларига кўра, дипломатик ваколатхоналар ишига тўсқинлик қилиш «яхшиликка олиб келмайди».

«Агар ишлар шу тарзда давом этса, бу биноларда фақат фаррошлар ишлайди», деди Путин.

Унинг сўзларига кўра, АҚШ президенти Доналд Трамп унга Россия-Украина уруши бўйича музокаралар жараёни Украина иштирокида ўтишини ва ҳеч ким уни музокаралардан четлатмаганини айтган.

Путин, шунингдек, Саудия Арабистонидаги Россия-Америка учрашувида, жумладан, иқтисодиёт, энергетика ва коинот масалалари муҳокама қилинганини айтди.

Унинг қўшимча қилишича, Трамп билан учрашиш истаги бор, аммо натижа бўлиши учун учрашувга тайёргарлик кўриш керак.

Шу билан бирга Владимир Путин Украина можаросини ҳал қилиш муддати бўйича АҚШ президенти Доналд Трампнинг фикри ўзгарганини айтди. Унинг таъкидлашича, Трамп аввалроқ Украинадаги инқирозни ҳал қилиш учун қисқа муддат ҳақида гапирган, «лекин маълумот олишни бошлаганидан сўнг, ўз позициясини ўзгартирган».

«У 6 ой вақт кетади, деди. Биз ҳозир муддат ҳақида гапирмаймиз. Лекин бу табиий», деди Путин.

18 февраль куни Саудия Арабистонида Россия ва АҚШ вакиллари ўртасида учрашув бўлиб ўтди. Томонлар «Украина масаласини тартибга солиш жараёнини» бошлашга ва музокарачиларни тайинлашга келишиб олди. Музокаралар тахминан тўрт ярим соат давом этди.