«Natija bor» - Putin Rossiya-AQSh muzokaralari haqida

Rossiya prezidenti Vladimir Putin 18 fevral kuni Saudiya Arabistoni poytaxti Ar-Riyozda bo‘lib o‘tgan Rossiya-Amerika muzokaralari natijalarini «yuqori» baholashini aytdi. Uning so‘zlaridan «Interfaks» iqtibos keltirdi.

«Ha, menga [muzokaralar natijalaridan] xabar berishdi. Men ularni yuqori baholayman. Natija bor», dedi Putin.

U, shuningdek, Moskva va Vashington «diplomatik vakolatxonalarning normal faoliyatini tiklashga kelishib olganini» tasdiqladi. Bu haqda bir kun avval AQSh Davlat kotibi Marko Rubio ma’lum qilgan edi. Rossiya prezidentining so‘zlariga ko‘ra, diplomatik vakolatxonalar ishiga to‘sqinlik qilish «yaxshilikka olib kelmaydi».

«Agar ishlar shu tarzda davom etsa, bu binolarda faqat farroshlar ishlaydi», dedi Putin.

Uning so‘zlariga ko‘ra, AQSh prezidenti Donald Tramp unga Rossiya-Ukraina urushi bo‘yicha muzokaralar jarayoni Ukraina ishtirokida o‘tishini va hech kim uni muzokaralardan chetlatmaganini aytgan.

Putin, shuningdek, Saudiya Arabistonidagi Rossiya-Amerika uchrashuvida, jumladan, iqtisodiyot, energetika va koinot masalalari muhokama qilinganini aytdi.

Uning qo‘shimcha qilishicha, Tramp bilan uchrashish istagi bor, ammo natija bo‘lishi uchun uchrashuvga tayyorgarlik ko‘rish kerak.

Shu bilan birga Vladimir Putin Ukraina mojarosini hal qilish muddati bo‘yicha AQSh prezidenti Donald Trampning fikri o‘zgarganini aytdi. Uning ta’kidlashicha, Tramp avvalroq Ukrainadagi inqirozni hal qilish uchun qisqa muddat haqida gapirgan, «lekin ma’lumot olishni boshlaganidan so‘ng, o‘z pozitsiyasini o‘zgartirgan».

«U 6 oy vaqt ketadi, dedi. Biz hozir muddat haqida gapirmaymiz. Lekin bu tabiiy», dedi Putin.

18 fevral kuni Saudiya Arabistonida Rossiya va AQSh vakillari o‘rtasida uchrashuv bo‘lib o‘tdi. Tomonlar «Ukraina masalasini tartibga solish jarayonini» boshlashga va muzokarachilarni tayinlashga kelishib oldi. Muzokaralar taxminan to‘rt yarim soat davom etdi.