Bloomberg: Trampning maslahatchilari Rossiyaga nisbatan sanksiyalarni yumshatish rejasini ishlab chiqmoqda

AQSh prezidenti Donald Trampning maslahatchilari Ukrainaga qarshi urush boshlaganidan keyin Rossiyaga nisbatan joriy etilgan sanksiyalarni yumshatish ustida ish olib bormoqda. Bu haqda Bloomberg vaziyatdan xabardor manbalariga tayanib xabar berdi.

Agentlik ma’lumotlariga ko‘ra, gap xususan, Rossiya neftiga qo‘yilgan cheklovlar haqida ketmoqda. 7 mart kuni Bloomberg o‘z manbalariga tayanib, Tramp ma’muriyatida G‘arb davlatlariga Rossiyadan bir barreli uchun 60 dollardan qimmat narxda sotib olingan neftni tashish va sug‘urtalashni taqiqlovchi «neftning eng yuqori narxi»ni bekor qilish masalasi muhokama qilinayotganini yozgandi.

Manbalarning ta’kidlashicha, sanksiyalarni yumshatish sharti Rossiyaning Ukraina bilan tinchlik bitimini tuzishga roziligidir. 7 mart kuni Donald Tramp agar Moskva Ukrainadagi jangovar harakatlarni to‘xtatib, Kiyev bilan muzokaralarga rozi bo‘lmasa, Rossiyaga «keng ko‘lamli sanksiyalar» bilan tahdid qilgandi.

Undan bir kun oldin esa AQSh prezidenti Rossiya hukumati «tanlov yo‘qligi» bois tinchlik bitimini imzolamoqchi ekani haqida gapirgandi. Trampning so‘zlariga ko‘ra, Ukrainada ham bundan boshqa yo‘l yo‘q.

Tramp ushbu bayonotlarning barchasini AQSh va Ukraina delegatsiyalari 11 mart kuni Jidda shahrida o‘tkazadigan muzokaralar arafasida bildirdi. OAV ma’lumotlariga ko‘ra, unda dronlar va uzoq masofaga mo‘ljallangan raketalar yordamida zarbalar berishni to‘xtatish, shuningdek, Qora dengizda jangovar harakatlardan voz kechish masalalari muhokama qilinadi.

Rossiya Amerika va Yevropa sanksiyalari joriy etilganidan beri neft eksportida «soyadagi flot»dan faol foydalanishga o‘tgan. Uning doirasida RFga rasman bog‘liq bo‘lmagan tankerlar belgilangan narxni chetlab o‘tmoqda. 9 mart kuni AQSh Kanadaning «soyadagi flot»ni kuzatish uchun maxsus guruh tuzish borasidagi taklifini rad etgani ma’lum bo‘lgandi.