Германия суди украиналикни ватанига экстрадиция қилишга рухсат берди

Германия федерал суд палатаси (BGH) ҳарбий хизматдан виждонан воз кечиш жиноят ишида экстрадиция қилиш учун мутлақ тўсиқ бўлолмайди, деган қарорга келди. Тегишли қарор 12 феврал, чоршанба куни Украина фуқаросини ўз ватанига экстрадиция қилиш ишида қабул қилинди.

Суд тушунтирганидек, бу экстрадиция қилиниши керак бўлган мамлакат халқаро ҳуқуқни бузган ҳолда қуролли ҳужумга учраган ҳолатларга тааллуқлидир, шунинг учун бундай сабабларга кўра ҳарбий хизматни ўташдан бош тортиш ҳуқуқи кафолатланмайди.

Ватанида қидирувда бўлган украиналик виждони унга қўлига қурол олишга йўл қўймаётганини айтган

Қарор Украина фуқаросига тегишли бўлиб, украиналик терговчилар уни ҳуқуқ-тартибот органи ходимини ҳақорат қилиш, таҳдид қилиш ва жисмоний тажовузда айбламоқда. Украина томони жиноятчиларни экстрадиция қилиш тўғрисидаги Европа конвенциясига мувофиқ унинг экстрадиция қилинишини талаб этмоқда, деб ёзади dpa агентлиги.

Федерал суд палатасига кўра, судланувчи Украинада беш йилгача қамоқ жазосига ҳукм қилиниши мумкин. Бироқ, у ўз ватанида ҳарбий хизматга чақирилишидан ва катта эҳтимол билан жанг қилишдан қўрқяпти. Унинг айтишича, хизмат пайтида қўлига қурол олиб, кимнидир ўлдириши мумкин, деган фикр унинг виждонига зид келади.

Таъкидланганидек, украиналикнинг иши дастлаб Дрезден Олий ер суди томонидан кўриб чиқилган. Бироқ у ердаги судялар таъқибга учраган шахснинг экстрадиция қилиниши Германия ҳуқуқ тизимининг асосий тамойилларига зид келмаслигига ишонч ҳосил қилишмаган, шунинг учун иш олий суд органига юборилган.