Болалар шифохонасининг жарроҳлик ва онкология бўлимлари вайрон бўлган. Уйлардан бирининг подъезди қулаган

8 июл тонгида Россия армияси Украина бўйлаб ёпирилма зарбалар йўллади, Киев, Днипро, Кривий Риҳ, Словянск, Краматорск шаҳарлари томон 40 дан ортиқ ракета учирилган. Украин расмийларига кўра, Киевда РФ ҳарбийлари фуқаролик инфратузилмаларига қасддан ҳужум қилган. Шевченково районида ракета «Охматдет» болалар шифохонаси корпусига урилиб, жонлантириш, жарроҳлик ва онкология бўлимларига зарар етказган. Шевченково ва Соломенский районларида иккита кўп қаватли бинога ҳам зарба келиб тушган, улардан бирининг подъезди тўлиқ қулаб тушган. Украина хавфсизлик хизматига кўра, «Охматдет» шифохонасига россияликларнинг Х-101 ракетаси билан зарба берилган. РФ мудофаа вазирлиги Киевдаги вайронгарчиликлар «украинларнинг ҳаво ҳужумидан мудофаа тизими ракеталари қулаши» оқибатида рўй берганини хабар қилган. Россиянинг Украина пойтахти бўйлаб зарбалари оқибатида камида 17 киши ҳалок бўлган, яна 41 киши яраланган. Шунингдек, Днипро ва Кривий Риҳ бўйлаб йўлланган зарбалар 11 кишини ҳаётдан олиб кетган.