Украина Қрим кўпригини бутунлай яксон қилиш бўйича янги операция тайёрламоқда

Украиналиклар бундан олдин Қрим кўпригини икки марта йўқ қилишга уринган. Биринчи сафар кўприкда юк машинаси портлатилган бўлса, иккинчи ҳолатда экипажсиз денгиз катеридан фойдаланилган ҳолда ҳужум уюштирилган.

Фото: The Moscow Times

Украиналик ҳарбийлар Қрим кўпригини бутунлай яксон қилиш имконини берадиган янги операцияни тайёрламоқда. Бу ҳақда Украина Қуролли кучлари (УҚК) Ҳарбий-денгиз кучлари қўмондони вице-адмирал Алексей Неижпапа The Observer’га берган интервюсида маълум қилди.

У олдинги ҳужумлар вақтида автомобил йўлига, шунингдек, темирйўл конструкциясига шикаст етказилганини эслатиб, натижада россиялик ҳарбийлар кўприк орқали оғир вагонларни ўтказа олмаётганини таъкидлади. Неижпапа Украина бу сафар Қрим кўпригини яксон этишига умид қилишини билдирди. «Россияликлар биз учинчи операцияни фаол муҳаокама қилаётганимизни тушунади», — дейди у.

Украина бундан олдин икки марта Қрим кўпригини йўқ қилишга уринган. 2022 йил 8 октябрда, РФ президенти Владимир Путиннинг 70 йиллик юбилейи нишонганланган сананинг эртаси куни кўприкда юк машинаси портлатилган эди, натижада, иккита автомобил йўли қулаб тушган, темирйўл қисмида ёнғин юз берган. Ўшанда Россия томони етказилган зарарни 7 миллиард рублдан зиёдга баҳолаган эди. Таъмирлаш ишлари 8 ой давом этган. Иккинчи уриниш 2023 йил 17 июлда амалга оширилган — бу сафар экипажсиз денгиз катерларидан фойдаланилган эди. Ушбу ҳужум натижасида кўприкнинг автомобиллар ҳаракатланадиган қисми яна шикастланганди.

Кейинроқ Украина Хавфсизлик хизмати раҳбари Василий Малюк ҳужумларни шахсан ўзи режалаштириб, унга раҳбарлик қилганини тан олганди. Унинг айтишича, биринчи ҳолатда ўтказиш пунктидаги сканерлар аниқлай олмаслиги учун юк машинасига пластик плёнкалар орасига яширилган 21 тонна гексоген юкланган. Шунингдек, украиналик мутахассислар GPS-координаталарни бузиб кўрсатишга қодир радиоэлектрон кураш воситаларини четлаб ўтадиган махсус тизимни ишлаб чиққан. Малюкнинг сўзларига кўра, юкни етказиш учун тасодифий одамлар танланган.

Иккинчи ҳужумда махсус денгиз дронлари — 850 килограмм портловчи моддани ташишга қодир Sea Baby камикадзелари яратилган. Унинг таъкидлашича, Украинанинг якуний мақсади кўприкни бутунлай яксон қилиш ҳисобланади. Бу ҳақда мамлакат раҳбарияти, жумладан, Володимир Зеленский ҳам бир неча бор гапирган.

2014 йилда Қрим аннексиясидан кейин 19 километрли кўприк яриморолнинг Россия билан интеграциялашувида муҳим омил бўлди. Уни қуриш ишлари 2016 йил февралда бошланган эди. Кўприк россияликларга Украинанинг жанубий ҳудудларини эгаллаб олган гуруҳларни аскар ва қуроллар билан таъминлашда ёрдам кўрсаган.

#Украина #Қрим кўприги