“Уйдаги охирги молни сотиб, компьютер олиб берган дадамга машина совға қилдим”

Нилуфар Омонова – 20 ёшда, Самарқанд шаҳрида IT'га ихтисослашган ўқув маркази очган, параллел равишда СамДУ талабаси. Ҳали жуда ёш бўлишига қарамай аллақачон бизнес бошлаб, даромад кўраётган тадбиркор қиз ўзининг таълимига рағбат берган ота-онаси учун яхши шароитлар қилиб беряпти. Дадасига машина совға қилган, Жомбой туманида қишлоқ шароитида яшаётган оиласини шаҳардан уй олиб, кўчириб келмоқчи.

“Микрофон – қизларда” рукнининг бу сонида Нилуфар Омонованинг дастурлашни ўрганиши ва бу йўналишда ўз бизнесини бошлашигача бўлган ҳикоясини тақдим этамиз.

“Қўй-мол боқиб катта бўлганман, ўшанда биринчи марта пул топганман”

Оилада 3 фарзандмиз: мен тўнғичиман. Мактаб вақтлари дарсдан сўнг оиламга ёрдам бўлиши учун мол боқишга чиқардим. Параллел университетга кириш учун мол боқиш жараёнида китоб ҳам ўқирдим. Бир-икки марта молларим далага тушиб кетганида, мен билан бирга мол боқадиганлар “Ўқиб ким ҳам бўлардинг”, деб устимдан кулишган. Ўшанда хафа бўлиб, дадамга бошқа мол боқмайман, деб айтганман.

Дадам эса менга “Агар молларни боқсанг, сут-қатиғини сотган пулинг ўзингга бўлади”, деганди. Шундан сўнг қизиқиб, молларимни даладан тўйдириб келадиган бўлдим. Олдинлари молнинг сут, қатиқ, сузмасини яқиндаги дўкон, ошхоналарга сотиб келиб, пулини онамга берардим. Энди эса ўзимда қоладиган бўлди. Ўшанда 8-9-синфларда ўқирдим, биринчи марта 50 минг сўмча биринчи маблағимни ишлаб топганман. Мактабда энг бой ўқувчилардан эдим. Бирор китоб керак бўлса, қўшимча дарсларга ўзимнинг пулим бўларди.

Вақт ўтиб бу йўналишда ҳам рақобат пайдо бўлди. Мен сут-қатиқ, сузмани сотаётганимни кўрган маҳалла қизлари ҳам мен олиб борадиган дўкон, ошхоналарга маҳсулотларини олиб бора бошлади. Ўшанда харидорларда танлов юзага келиб, меникини олмай қўйган пайтлар ҳам бўлди.

Ўшанда мен қандай қилиб маҳсулотимни сота олишим ҳақида интернетдан маълумотлар излай бошладим. Ва ҳаммадан фарқли – олиб борадиган сузмамни целлофан пакет билан ўрайдиган бўлдим ва бу фойда берди. Бу менинг маркетинг бўйича эгаллаган биринчи билимим эди.

“Талабаликда дўконда ишладим”

Ўқишга киргунча шу тарзда ўқиб уйдагиларга ёрдам бердим ва мактабни битириб, Ўзбекистон Миллий университетига контракт асосида ўқишга кирдим. Ўшанда биринчи марта Тошкентга келдим. Дастлаб, мослашишим қийин бўлган: катта шаҳар, уйдан узоқлашмаганман.

Лекин яна ҳаракат қилишим кераклигини билиб, дастурлашни ўрганишга қарор қилганман. Бироқ оилавий шароит туфайли уйдагилардан курс учун пул сўрай олмас эдим. Шунинг учун ўқишга пулни дўконда сотувчилик қилиб тўпладим ва онлайн тарзда дастурлашни ўргандим.

Дастурлашдан топилган илк даромад ва сигир пулига олинган компьютер

Дастурлаш йўналишидаги илк даромадимни – 2 млн сўмни 17 ёшда топганман. Лекин компьютерим оддийлик қилгани учун мен ишлатадиган дастурларни кўтара олмай қолди. Шунда дадамга вазиятни тушунтириб, компьютер кераклигини айтганман. Орадан бироз вақт ўтиб, почта орқали уйдан худди мен хоҳлаган русумли компьютер келди. Жуда хурсанд бўлиб кетганман.

Бироқ кейинроқ уйга, Самарқандга бориб, дадам уйдаги охирги сигирни менга компьютер олиб бериш учун сотганини билиб қолдим. Ўшанда кўзимга ёш келган ва зўр дастурчи бўлиб, кўп пул топаман, ота-онам бошқа қийинчилик кўрмайди, деб мақсад қилдим.

Covid-марказдаги иш

2020 йил баҳорида талаба пайтим пандемия бошланиб қолди. Мен ишлаётган компания ҳам ёпилди, уйга ҳам касаллик юқтириб олган бўлсам-чи, деб қайтмадим. Ўша орада Узэкспомарказдаги Covid-марказига фаррош олиниши ҳақидаги эълонни ўқиб қолдим.

Ўшанда гарчи бу ер хавфли бўлса-да, иш топганимдан хурсанд эдим. Коронавирус марказида 14 кун ишлаб 10 млн сўм маош олгандим. Бироқ ўша ерда ишлаган, таниш бўлиб қолган бир аёл пулга муҳтожлигини айтганда 6,5 млн сўмни қарз бердим. Лекин қайтариб ололмадим. Қўлимда эса 3,5 млн сўм қолганди.

“Сомсахонадан сўнг яхши иш топдим”

Ҳамма жой карантинга ёпилгани учун иш топа олмай қийналганман. Охири ўзим ижарада турган уй яқинидаги сомсахонада сомса сотишга мажбур бўлгандим. Тўғриси, бу мен учун оғриқли хотира. 2-3 ҳафтача ишлаганимдан сўнг бир киши сомса сотиб олишга келди ва ҳисоб-китобга усталигимни кўриб ўз компаниясига ишга таклиф қилди.

Бу автосалон эди, у ердаги ишим давомида кўплаб бизнесменларни кўрдим ва бу менинг ўз бизнесимни бошлашим учун ғоялар олишимга ёрдам берди.

Ўқув марказининг очилиши

Бу орада карантин юмшатилди ва мен бир ўқув марказининг битта хонасини ижарага олиб, дастурлаш бўйича дарс беришни бошладим.

Бошида жуда қийин бўлган, иш бошлаганим учун эълон беришга ҳам пулим йўқ эди. Ўшанда Telegram-канали бор бир йигит “Қиз бола экансиз, қиз бола дастурчилар кам”, деб рекламамни бепул чиқариб берган. Шундан сўнг ўқувчилар тўпланди ва дарс ўтишни бошладим.

Дастлаб, 4 млн сўм, сўнг 10 млн, 14 млн сўмгача даромад топдим.

Самарқандга қайтиш

Лекин бу орада Самарқандга, ўз вилоятимга қайтдим. Ўқишимни Самарқанд давлат университетида давом эттиряпман. Ўтган йилидан бошлаб Самарқандда ўқув маркази очиш учун ҳаракат қилдим ва ҳозир 2 та филиалга эга ўқув маркази эгасиман. Ходимларимиз 10 млн сўмгача маош олишяпти.

Инвестиция ва ташқи савдо вазирлиги томонидан ўтказилган танловда бизнес лойиҳам ғолиб бўлиб, 100 минг долларлик инвестицияга эга бўлдим, ҳозир бу маблағ билан бизнесимни кенгайтириш ҳақида режалаштиряпман.

Менга уйдаги охирги сигирни сотиб компьютер олиб берган дадамнинг ҳолати доим эсимда туради. Дадамга ўзи хоҳлагандай автомобил совға қилдим, энди оиламни Самарқанд шаҳрига кўчириб келиш ҳаракатидаман.

Зилола Ғайбуллаева суҳбатлашди.

Тасвирчи ва монтаж устаси – Абдусалим Абдувоҳидов.

Агар сиз интилувчан қизларни танисангиз ёки сиз ҳам шундайлардан бири бўлсангиз, Telegram'да @Mikrofonqizlarda_bot орқали биз билан боғланинг. Дастурчи, сотувчи, ҳунарманд, букблогер, талаба – хуллас, қайси йўналишда фаолият юритаётган бўлишидан қатъи назар, микрофонни қизларга беришга тайёрмиз.