Tramp Baydenning maxfiy ma’lumotlardan foydalanish huquqini bekor qildi

AQSh prezidenti Donald Tramp Jo Baydenning maxfiy hujjatlardan foydalanish imkoniyatlarini chekladi. Bu haqda Tramp o‘zining Truth Social ijtimoiy tarmog‘i orqali ma’lum qildi.

«Jo Bayden maxfiy ma’lumotlarni olishda davom etishiga hech qanday ehtiyoj yo‘q. Shu bois biz Jo Baydenning ruxsatnomasini chaqirib olamiz va har kuni uning uchun o‘tkaziladigan razvedka masalalari bo‘yicha brifinglarni to‘xtatamiz», — deydi AQShning amaldagi prezidenti.

Donald Tramp maxsus prokuror Robert Xurning Baydenni xotirasida muammolar borligi keltirilgan hisobotiga asoslanib shunday yo‘l tutmoqda. «Jo, sen bo‘shatilding. Amerikani yana buyuk qilamiz!» — deb yozadi Tramp.

Xurning hisoboti bir yil oldin Baydenning garajidagi ombor va Deleverdagi uyidan vitse-prezidentlik davridagi maxfiy hujjatlardan biri topilganidan keyin boshlangan edi. Tintuvlar davomida demokratning sobiq kabinetidan Amerika razvedkasining hisobotlari va Ukraina, Eron va Buyuk Britaniyaga taalluqli brifing materiallari topilgan.

Xurning ta’kidlashicha, Bayden maxfiy hujjatlarni vitse-prezidentlik muddati tutaganidan keyin ham saqlab kelgan va bu harakat «milliy xavfsizlikka jiddiy tahdid uyg‘otadi». Ammo u demokratga ayblov e’lon qilmagan. Maxsus prokurorga ko‘ra, Bayden sud hay’ati qarshisida o‘zini «xotirasi yomonlashgan keksa inson sifatida namoyish etishi mumkinligi sabab» uni javobgarlikka tortish qiyin bo‘ladi.

Donald Trampning o‘ziga nisbatan 2022 yilda Mara-Lago qarorgohidan maxfiy hujjatlar topilganida mas’uliyatsizlik bo‘yicha jinoyat ishi qo‘zg‘atilgandi. Ammo u prezident etib saylangach barcha jinoyat ishlari to‘xtatildi, ularning ikkitasi tergovi bilan shug‘ullangan maxsus prokuror Jyek Smit esa iste’foga chiqdi.