AQShning 46-prezidenti Jo Bayden ma’muriyati o‘z faoliyatining oxirgi yilida Ukrainaga qurol yetkazib berish bo‘yicha qarorlarni kechiktirgan, deb xabar beradi Reuters.

Agentlik ma’lumotlariga ko‘ra, asosiy yetkazib berishlar Ukrainaga 60 milliard dollar miqdorida qo‘shimcha yordam ajrata olmagan Kongressning harakatlari, shuningdek, qurol yuborish Rossiya tomonidan eskalatsiyaga olib kelishi mumkinligi xavotiri sabab kechikkan.

Reuters tahlillariga ko‘ra, Kongress Ukrainaga yordam ajratishni ma’qullaganidan keyin ham qurol-yarog‘ yetkazib berishdagi kechikishlar davom etgan. 2024 yil noyabrida AQSh yil davomida Amerika armiyasi omborlaridan ajratish rejalashtirilgan harbiy yordamning faqat yarmini yetkazib bergan. Donald Tramp AQSh prezidentligi saylovlarida g‘alaba qozongach, harbiy yordam ko‘rsatish keskin oshgan. Shu bilan birga, dekabr oyiga kelib AQSh va’da qilingan zirhli texnikalarning faqat 30 foizini Ukrainaga yetkazib bera olgan.

Pentagon vakillari va Baydenning sobiy ma’muriyati, shuningdek, ukrainalik harbiylar bunga izoh berishdan bosh tortdi. Ukraina Mudofaa vazirligi, prezident Volodimir Zelenskiy ham Reuters so‘rovlariga javob qaytarmagan.

Jo Bayden administratsiyasi RF Ukrainaga qarshi keng ko‘lamli urush boshlaganidan beri Kiyevga 63 milliard dollarlik yordam ajratgan. Donald Tramp 2024 yil noyabrda saylovlarda g‘alaba qozonganidan keyin Oq uy harbiy yordam yuborishni tezlashtirgan.