London: Rossiya kuchlari ZAES reaktorlarida mudofaa pozitsiyalarini o‘rnatdi

Ukrainadagi urush bo‘yicha vaziyatga bag‘ishlangan navbatdagi sharhda Britaniya Mudofaa vazirligi mart oyidagi sun’iy yo‘ldosh suratlariga e’tibor qaratdi.

Foto: Picture Alliance

Ulardan xulosa qilish mumkinki, rossiyaliklar Zaporijjya atom elektr stansiyasi reaktorlarining bir nechta binolarida mudofaa pozitsiyalarini o‘rnatmoqda.

Suratlarda bir nechta reaktorlarning tomidagi qum qoplari aks etgan, deya qayd etiladi Twitter’da e’lon qilingan sharhda.

Bu - reaktor binolari taktik mudofaa rejasida hisobga olinayotganining birinchi belgisidir, deya ma’lum qildi London.

Britaniya idorasi bu harakatlarda Rossiya qo‘mondonligining Ukraina Qurolli kuchlari tomonidan amalga oshirilishi kutilayotgan qarshi hujum oldidan xavotirini ko‘rmoqda.

Qayd etilishicha, ushbu holat jangovar harakatlar paytida ZAESga zarar yetkazish xavfini oshiradi, ammo reaktorlarga falokatli zarar yetishi ehtimoldan yiroq, sababi Zaporijjya atom elektr stansiyasi konstruksiyasi jiddiy mustahkamlangan, deyiladi bayonotda.

#Rossiya #ZAES