Трамп Конгрессда «Америка орзусини тиклаш» мавзусида нутқ сўзлайди

АҚШ президенти Доналд Трамп Конгрессга «Мамлакатнинг ҳолати» ҳақидаги мурожаати билан чиқади. Оқ уй матбуот котиби Кэролайн Левиттнинг Fox News телеканалига берган интервьюсида айтишича, нутқнинг мавзуси «Америка орзусини тиклаш» бўлади.

Унинг сўзларига кўра, Доналд Трамп ўз нутқида «келажакка нисбатан дадил, амбицияли ва онгли қарашларини баён қилади». Fox News хабарига кўра, Америка президентининг нутқи тўрт бўлимдан иборат бўлади:

- иккинчи муддати давомида мамлакатда ва хорижда эришилган муваффақиятлар;

- АҚШ маъмуриятининг иқтисодиёт учун ҳаракатлари;

- Конгрессдан чегара хавфсизлиги учун қўшимча маблағ ажратишни талаб қилиш;

- «дунёда тинчлик ўрнатиш» режалари.

Тадбир Тошкент вақти билан 5 март куни соат 7:00 да бўлиб ўтади.

Шу билан бирга, Демократик партия вакиллари Трампнинг Конгрессдаги нутқини блоклаши мумкин, деб хабар берди Axios. Қайд қилинишича, Республикачи маъмуриятнинг сиёсатига норозилик билдириш мақсадида унинг нутқини бузиш эҳтимоли кўриб чиқилмоқда. Трампнинг Украина бўйича позицияси ҳам норозиликка сабаб бўлмоқда.

Баъзилар, агар Трамп нутқи давомида «баъзи номақбул ибораларни айтса», қарсак чалмаслик ёки палатани тарк этишни таклиф қилмоқда. Трампга қарши плакатлар, тухум ёки бўш тухум қутилари (инфляция ошиб бораётганини кўрсатиш учун), қизил карточкалардан фойдаланиш муҳокама қилинмоқда.