World Boxing федерацияси ХОҚ томонидан вақтинча тан олинди

Тегишли қарор ХОҚ Ижро қўмитасининг 26 февраль куни бўлиб ўтган йиғилишида қабул қилинди.

Фото: Getty images

World Boxing федерацияси Халқаро олимпия қўмитаси (ХОҚ) томонидан боксни глобал даражада бошқарадиган халқаро федерация сифатида вақтинча тан олинди.

Тегишли қарор ХОҚ Ижро қўмитасининг 26 февраль куни бўлиб ўтган йиғилишида қабул қилинди, деб хабар берди қўмита матбуот хизмати. Қайд қилинишча, ташкилот ХОҚ томонидан қўйилган кўплаб талабларни бажарган ва бажармоқда.

World Boxing федерациясига беш қитъадан 78 та миллий федерация киради. 2024 йилда Парижда бўлиб ўтадиган Олимпиада ўйинларида боксчиларнинг 62 фоизи ва медаль совриндорларининг 58 фоизи ушбу федерациялар аъзолари эди. Ўзбекистон 2024 йил ноябрида World Boxing аъзоси бўлди.

2023 йилда ХОҚ россиялик Умар Кремлёв бошчилигидаги Халқаро бокс ассоциациясини (IBA) тан олиш ҳақидаги қарорини бекор қилди.

Аввалроқ, 2019 йилда ХОҚ ташкилот бошқаруви, молия ва ҳакамлик фаолияти билан боғлиқ шикоятлар туфайли IBA аъзолигини тўхтатиб қўйганди. IBA 2020 йилги Токио Олимпиадасига саралаш ва Олимпиада мусобақаларини ташкил этиш билан шуғулланмади ҳамда унга 2024 йилда Парижда ва 2028 йилда Лос-Анжелесда бўлиб ўтадиган ўйинларда бокс бўйича Олимпиада турнирини ташкил этишга рухсат берилмади. IBA вазифалари ХОҚ томонидан амалга оширилди.

#Бокс #IBA #World Boxing