Путин Ар-Риёддаги музокаралар натижасини «юқори баҳолаяпти»

«Натижа бор», деди Россия президенти Саудия Арабистонидаги АҚШ билан музокаралар ҳақида. Путин Трамп билан учрашмоқчи эканлигини, аммо учрашувга тайёргарлик кўриш кераклигини таъкидлади.

Фото: kremlin.ru

Россия президенти Владимир Путин Ар-Риёдда бўлиб ўтган Россия-Америка музокаралари ҳақида ҳисобот олди ва уларнинг натижаларини «юқори баҳолади». «Ҳа, улар бу ҳақда менга хабар беришди. Мен уларни юқори баҳолайман. Натижа бор», — деди у 19 феврал, чоршанба куни Санкт-Петербургдаги дрон ишлаб чиқарувчи заводга ташрифи чоғида журналистлар саволларига жавоб берар экан.

Путиннинг айтишича, бир кун аввал ўтказилган учрашувдан мақсад «Россия ва АҚШ ўртасидаги ишончни ошириш» бўлиб, уларсиз кўп мавзуларни, жумладан, Украинадаги можаро билан боғлиқ масалаларни ҳал қилиб бўлмайди. «Биз дипломатик миссиялар фаолиятини нормал режимда давом эттиришга келишиб олдик. Вашингтон ва Москвадан дипломатларнинг доимий равишда чиқариб юборилиши яхши нарсага олиб келмайди. Агар ишлар шу тарзда давом этса, бизда бу биноларда фақат фаррошлар ишлайди», — деди Россия президенти.

Унинг сўзларига кўра, Ар-Риёдда муҳокама қилинган мавзулар орасида Россиянинг Суриядаги мавжудлиги ва Фаластин-Исроил можаросини ҳал қилиш ҳам бор эди, бироқ Москва Украинадаги вазиятни тартибга солишга биринчи даражали аҳамият беради. Россия томони Украина можаросини ҳал қилиш учун «музокаралар столига қайтишга тайёр», деди Путин ва ҳеч ким Киевни музокара жараёнидан четлаштирмаётганини айтди.

Россия президенти америкалик ҳамкасби Доналд Трамп билан учрашиш истаги борлигини, бироқ учрашувга «натижага эришиш учун» тайёрланиш кераклигини таъкидлади.

Ар-Риёдда АҚШ-Россия музокаралари

18 феврал куни Саудия Арабистони пойтахтида Россия ва Америка делегациялари ўртасидаги музокаралар чоғида президентлар Владимир Путин ва Доналд Трампнинг эҳтимолий учрашуви муҳокама қилинди. Учрашув якунида томонлар Россиянинг Украинадаги урушини тугатиш масаласини муҳокама қилиш учун музокарачиларни тайинлашга ҳам келишиб олдилар.

19 феврал куни Россия давлати раҳбари матбуот котиби Дмитрий Песков Трамп ва Путин ўртасидаги учрашув шу ой охиригача бўлиб ўтиши мумкинлигини тан олди. Трамп, шунингдек, бир кун аввал феврал ойида Россия президенти билан учрашиш эҳтимолини истисно этмади.

#Ар-Риёд #Владимир Путин