Оқ уй USAID’нинг энг бемаъни харажатлари рўйхатини эълон қилди

Оқ уй Халқаро тараққиёт агентлиги (USAID) ўнлаб йиллар давомида «катта миқдордаги маблағларни кулгили ва кўп ҳолларда зарарли лойиҳаларга йўналтириб келгани»ни маълум қилди. Хусусан, USAID «Ал-Қоида»нинг паёклари учун ҳам пул сарфлаган.

Оқ уй сайтида агентликнинг шу каби харажатларига 12 та мисол келтирилган бўлиб, барча ҳолатларда ҳукумат ОАВдаги материалларга таянган. Рўйхатдан, хусусан, қуйидагилар ўрин олган:

• Суриядаги «Ал-Қоида» жангарилари учун «юз минглаб порция овқат» етказиб бериш;
• «Сербия ишчи ва бизнес ҳамжамиятларида тенглик ҳамда инклюзияни рағбатлантириш» учун 1,5 миллион доллар;
• Ирландияда мюзикл постановкаси учун 70 минг доллар;
• Колумбиядаги «трансгендер опера» учун 47 минг доллар;
• Перуда «трансгендер комикс» учун 32 минг доллар;
• ривожланаётган мамлакатларда «персонал» контрацептив ва туғилишни назорат қилиш воситаларини чиқаришни молиялаштириш;
• «Афғонистонда кўкнори етиштириш ва героин ишлаб чиқариш учун ишлатиладиган суғориш каналлари, қишлоқ хўжалиги техникаси ҳамда ўғитларни» молиялаштириш учун «юз миллионлаб доллар».

USAID — АҚШ ҳукумати ҳузуридаги мустақил агентлик бўлиб, бошқа давлатларга ёрдам кўрсатиш билан шуғулланади. 3 феврал куни Ҳукумат самарадорлиги департаментига (DOGE) раҳбарлик қилаётган тадбиркор Илон Маск USAID тугатилишини эълон қилди. Давлат котиби Марко Рубио агентлик директори вазифасини бажарувчи этиб тайинланган.

Халқаро тараққиёт агентлиги президент Жон Кеннеди томонидан совуқ уруш вақтида — 1961 йилда Конгресс чет эл ёрдамини тақиқлаш тўғрисидаги қонунни қабул қилганидан кейин тузилган. У вақтда агентлик фаолияти фақат СССРга қарши туришдан иборат бўлган. Ҳозир АҚШ — гуманитар ёрдам кўрсатувчи дунёдаги энг йирик донор бўлиб, мамлакат бюджетининг қарийб 1 фоизини шунга сарфлайди.