Zafar Hoshimov QQS stavkasini pasaytirish qanday ta'sirga ega bo‘lishini baholadi

Iqtisodiyot 15:10 / 12.09.2019 37634

Korzinka.uz tarmog‘ining asoschisi va rahbari Zafar Hoshimov prezident Shavkat Mirziyoyevning qo‘shilgan qiymat solig‘i (QQS) stavkasini kamaytirish bo‘yicha topshirig‘iga izoh berdi.

Bir kun oldin davlat rahbari Moliya vazirligiga bugungi kunda 20 foizni tashkil etayotgan qo‘shilgan qiymat solig‘i stavkasini kamaytirish bo‘yicha aniq asoslangan taklif kiritish vazifasini topshirdi

«Mubolag‘asiz aytish mumkinki, ushbu vazifa yangi Soliq kodeksi loyihasini muhokama qilish jarayonidagi eng muhim voqeadir. Soliq stavkalari, birinchi navbatda, QQS stavkasining soliq to‘lovchilar bazasini parallel ravishda kengaytirish va ushbu soliq bo‘yicha barcha imtiyozlarning bekor qilinishi jarayonida pasaytirilishi yashirin iqtisodiyot sektorining qisqarishiga yordam berib, soliq solishni biznes uchun yanada adolatli qiladi», - deb yozadi Hoshimov o‘zining Facebook’dagi sahifasida.

Bularning barchasi ishbilarmonlik muhitini yaxshilash va iqtisodiyotning investitsion jozibadorligini oshirishga yordam beradi, deya ta'kidlab o‘tdi u.

Tadbirkorning eslatishicha, Soliq konsepsiyasi loyihasining dastlabki variantida 12 foizlik QQS stavkasi taklif qilingan. Ushbu stavkaning mantig‘i shundan kelib chiqqanki, faol transchegaraviy savdo mavjud bo‘lgan qo‘shni mamlakatlarning aksariyatida QQS stavkasi aynan shundaydir. Soliq stavkasini ushbu ko‘rsatkichgacha kamaytirish, tadbirkorning fikriga ko‘ra, qo‘shnilar bilan tovarlarga ichki narx shakllanishidagi tafovutni sezilarli darajada kamaytirish, yashirin import oqimining pasayishi, shuning barobarida yashirin bozorning sezilarli darajada qisqarishiga olib keladi.

«Ushbu stavka foydasiga shuni keltirish mumkinki, Moliya vazirligi hisobotiga ko‘ra joriy yilda amaldagi QQS stavkasi 20 foizni tashkil etgani holda, soliq yig‘imi 11,5 foizlik darajaga teng bo‘lgan. Qolgan qismi alohida korxonalar va iqtisodiyotning butunboshli sektorlarida QQS to‘lovi bo‘yicha turli imtiyozlar mavjudligi sabab yig‘ilmagan», - deya qayd etib o‘tdi Hoshimov.

Ushbu imtiyozlarning barchasi bekor qilinsa va shu bilan birga soliq 12 foizga kamaytirilsa, unda budjet zarar ko‘rmaydi, deya hisoblaydi u. 

«Hozirda 20 foizlik QQSdan cho‘chiyotgan ko‘plab korxonalar soyadan chiqsa, unda budjet yig‘imlari sezilarli darajada oshishi kerak, - deya ta'kidlab o‘tdi Hoshimov. - Umid qilamanki, stavkani pasaytirish shunchaki rasmiy qadam emas, balki samarali va asosli jarayonga ega bo‘ladi».

Ko‘proq yangiliklar: