Rossiyada migrantlarning xorijga pul o‘tkazmalarini cheklash taklif qilindi

Rossiyada migrantlarning pul o‘tkazmalari cheklanishi mumkin. «Noviye lyudi» partiyasi deputatlariga ko‘ra, ishlash uchun kelgan chet elliklar xorijga o‘zlarining rasmiy maoshidan ko‘proq mablag‘ o‘tkazmasligi kerak.

Tashabbus mualliflari Aleksey Nechayev, Sardana Avksenteva va Vladimir Plyakin nuqtai nazaricha, bunday taqiq «moliyaviy operatsiyalar shaffofligini oshirish, yashirin iqtisodiyotga qarshi kurash, soliq tushumlarini oshirish va iqtisodiy xavfsizlikni ta’minlash» uchun kerak. Taklif mamlakat Markaziy banki rahbari Elvira Nabiullinaga yuborilgan.

Parlament a’zolarining ta’kidlashicha, amaldagi qonunlarda pul o‘tkazmalari miqdori migrantlarning rasmiy maoshlariga mos kelishi nazorat qilinishini ta’minlaydigan samarali mexanizmlar mavjud emas. Ularning fikricha, bu chet el fuqarolariga noqonuniy daromadlarni yashirish, soliqdan qochish va Rossiyadan pul olib chiqib ketish imkonini beradi. Ruxsat etilganidan ko‘proq miqdordagi pulni xorijga yubormoqchi bo‘lgan migrantlardan esa olgan daromadi qonuniyligini tasdiqlovchi deklaratsiya talab etiladi. O‘z navbatida banklar shubhali tranzaksiyalarga chek qo‘yish uchun chet elliklarning moliyaviy operatsiyalari ustidan nazoratni kuchaytirishi kerak.

Avvalroq Rossiya Davlat Dumasi migrantlar uchun qo‘shimcha davlat boji joriy etish bo‘yicha qonun loyihalarini ko‘rib chiqishni boshlashi to‘g‘risida xabar berilgandi. Xususan, chet el fuqarosi yoki fuqaroligi bo‘lmagan shaxsga patent berganlik yoki qayta rasmiylashtirganlik uchun – 4200 rubl, mehnat ruxsatnomasining amal qilish muddatini uzaytirganlik uchun – 4200 rubl, patent yoki mehnat ruxsatnomasining dublikatini berganlik, ularga o‘zgartirishlar kiritganlik uchun – 2100 rubl miqdorida yig‘im joriy etish taklif qilinmoqda.