Qamchiqda yukxonadagi elektroskuterda yuz bergan qisqa tutashuv oqibatida Changan yonib ketdi

Kecha, 11 aprel kuni soat 21:53 da A-373 «Toshkent-O‘sh» avtomobil yo‘lining Qamchiq dovoni qismida yong‘in sodir bo‘lgan.

FVV xabariga ko‘ra, «Toshkent-Vodiy» yo‘nalishida harakatlangan Changan rusumli avtotransport vositasi yukxonasida bo‘lgan elektroskuterning quvvatlagichida yuzaga kelgan qisqa tutashuv natijasida yong‘in kelib chiqqani to‘g‘risida «Qamchiq» maxsus qidiruv, yong‘in-qutqaruv boshqarmasiga xabar qilingan.

Shunga ko‘ra, 2 ta yong‘in-qutqaruv ekipaji soat 22:09 da voqea joyiga yetib borib, yong‘in soat 22:11 da o‘rab olingan va soat 22:12 da yong‘in to‘liq bartaraf etilgan.

Yong‘in natijasida avtotransport vositasining salon qismi hamda yukxonasi yonib zararlangan. Tezkor harakatlar natijasida yukxonada bo‘lgan 18 ta velosipeddan 9 tasi va 4 ta elektroskuterdan 1 tasi yong‘indan saqlab qolingan.

Hodisa oqibatida tan jarohati olgan va halok bo‘lganlar yo‘q.