Boosty servici deyarli 30 ga yaqin «chet el agenti»ning akkauntini blokladi

Amsterdamda joylashgan, ilgari Mail.ru Group'ga tegishli bo‘lgan Boosty donatlar servisi Rossiya Federatsiyasi tomonidan «chet el agenti» deb e’lon qilingan faollar, jurnalistlar, ommaviy axborot vositalari va madaniyat arboblarining o‘nlab akkauntlarini bloklab qo‘ydi. Bu foydalanuvchilarning barchasida Rossiya Adliya vazirligi tomonidan yuritiladigan «chet el agentlari» reyestrida qayd etilgan Boosty'ga havolalar bor, deb yozadi "Vyorstka" 9 aprel, chorshanba kuni.

Nashr ma’lumotlariga ko‘ra, kamida 26 ta akkaunt bloklangan, jumladan, jurnalistlar Tatyana Felgengauer va Mariya Borzunova, sport sharhlovchisi Aleksandr Shmurnov, sharhlovchi Yuliya Latinina, komik Mixail Shats, Astra nashri, faol Darya Xeykinen va kino tanqidchisi Anton Dolinning. Hammasi bo‘lib 53 kishi va tashkilotda Boosty'ga havolalar mavjud, deb yozadi "Vyorstka".

Moskvalik siyosatchi Elvira Vixareva ham 8 aprel kuni uning akkaunti bloklangani haqida Facebookʼda ma’lum qildi: «Bu Rossiyada qonuniy ravishda pul olishning so‘nggi imkoniyati edi. Albatta, men hech qanday tushuntirishlarni olmadim, shunchaki endi xizmatdan foydalanish imkoniyati yo‘q», deb yozdi u. Ertasi kuni Vixarevaning yozishicha, Boosty vakili bloklashni «chet el agentlari» tomonidan pul olish va ulardan foydalanishni tartibga soluvchi Rossiya qonunchiligi talablari bilan bog‘lagan. Uning so‘zlariga ko‘ra, akkauntni tiklash faqat barcha pulli kontentga kirishdan o‘chirilgandan keyingina mumkin bo‘ladi.