Axios: Netanyahu G‘azo va tariflarni muhokama qilish uchun AQShga tashrif buyuradi 

Isroil bosh vaziri Binyamin Netanyahu Oq uyda AQSh prezidenti Donald Tramp bilan shaxsan uchrashib, import bojlarini olib tashlash bo‘yicha muzokaralar olib borishni rejalashtirmoqda. Bu haqda Amerikaning Axios axborot portali 5 aprel, shanba kuni vaziyatdan xabardor to‘rt manbaga tayanib xabar berdi.

Nashr ma’lumotlariga ko‘ra, Netanyahuning Vashingtonga tashrifi 7 aprel, dushanba kuni bo‘lib o‘tishi mumkin. AQSh Isroil importiga qo‘yadigan bojlardan tashqari, yetakchilar G‘azodagi vaziyat va AQSh-Eron yadroviy kelishuvini muhokama qilishi kutilmoqda.

Isroil bosh vaziri tez orada AQShga kelishini bir kun avval Donald Trampning o‘zi tasdiqlagan edi. 4 aprel, juma kuni u prezidentning Air Force One samolyoti bortida jurnalistlarga Xalqaro jinoiy sud hibsga olishga order berganiga qaramay, o‘sha paytda Budapeshtga tashrif buyurgan Netanyahu va Vengriya bosh vaziri Viktor Orban bilan telefon orqali gaplashganini aytdi. Liderlar Vengriyaning Xalqaro jinoiy suddan chiqishini muhokama qildilar va tariflar masalasiga to‘xtaldilar. Shundan so‘ng Tramp Netanyahuni bu masalani shaxsan muhokama qilishga taklif qildi, biroq aniq sanani belgilamadi.