Yaponiyada sho‘rvadan kemiruvchi chiqqani tufayli salkam 2 mingta restoran vaqtincha yopildi

Yaponiyaning Sukiya restoranlar tarmog‘i mijozlar sho‘rvasidan kemiruvchi chiqqanidan keyin barcha ovqatlanish maskanlari faoliyatini to‘xtatib qo‘ydi, deb xabar beradi NHK.

Hodisa 21 yanvar kuni sodir bo‘lgan. Biroq kompaniya bu haqda faqat o‘lik kemiruvchi haqidagi video ijtimoiy tarmoqlarda tarqalgach, oradan 2 oy o‘tib xabar bergan. 28 mart kuni Tokiodagi restoranda amalga oshirilgan buyurtmadan esa suvarak topilgan. Mazkur xabarlar fonida restoranlar tarmog‘ini boshqaruvchi Zensho Holdings qimmatli qog‘ozlari qiymati tushib ketdi.

Shundan keyin Sukiya tarkibiga kiruvchi 1900 taga yaqin restoran faoliyati 31 martdan 4 aprelga qadar to‘xtatib qo‘yildi. Bunda faqat savdo markazlarida joylashgan nuqtalar yopilmadi.

Sukiya mol go‘shti, guruch va piyozdan tayyorlanadigan yapon taomi — gyudonni tayyorlashga ixtisoslashgan. Kompaniya 4 apreldan aksariyat ovqatlanish shoxobchalari faoliyatini qayta boshlashini ma’lum qildi, biroq ular endi kun-u tun ishlamaydi: restoranlar «intensiv tozalashlar» uchun bir soatga yopiladi.