Fransiyada ultrao‘ng siyosatchilar ommaviy norozilik namoyishlar o‘tkazmoqchi

Mazkur jinoyat ishi doirasida yana 20 nafar kishi — deputatlar va yordamchilar ham aybdor deb topilgan.

Sud Le Penga to‘rt yillik qamoq jazosini tayinladi, shundan ikki yili shartli. Qolgan ikki yil davomida u elektron bilguzuk taqib yuradi. Shuningdek, unga 100 ming yevro jarima ham solindi.

Bu qaror uni 2027 yilgi prezidentlik saylovida ishtirok etishdan mahrum qiladi.

Le Pen sud qarorini «siyosiy o‘ch olish», deb atadi va hukm e’lon qilinishi oldidan sud zalini tark etdi. Oddiy holda apellyatsiya tugamagunicha jazo kuchga kirmaydi, ammo bu gal sud saylovda ishtirok etishni taqiqlashni darhol amalga oshirishga qaror qildi. Reuters xabariga ko‘ra, agar apellyatsiya shikoyati qanoatlantirilmasa, muxolifat yetakchisi 5 yil davomida davlat lavozimlariga saylana olmaydi.

So‘nggi so‘rovlarga ko‘ra, Le Pen prezidentlik poygasida 34–37 foiz qo‘llab-quvvatlovga ega edi.

Hukmga qaramay, Le Pen o‘z siyosiy faoliyatini to‘xtatmasligini bildirdi. «Men taslim bo‘lmayman. Menga qarshi siyosiy qaror qabul qilindi», — dedi u TF1 telekanalida. U 2027 yilgi prezidentlik saylovlarida qatnashishga umid qilmoqda.

Le Pen sudni «avtoritar rejimlarcha ish tutganlikda» aybladi. So‘rovlarga ko‘ra, u saylovda asosiy da’vogarlardan biri bo‘lishi mumkin. Unga Italiya, Vengriya va Niderlandiyadan siyosiy qo‘llab-quvvatlash bildirildi.

Fransiyada ultrao‘ng siyosatchilar Marin Le Penni sud hukmi orqali prezidentlik poygasidan chetlatilishiga qarshi ommaviy norozilik namoyishlariga chaqirmoqda.

Uning siyosiy hamrohi Jordan Bardella hukmni demokratiyaga hujum deb atab, fransuzlarni g‘azabini ko‘rsatishga chaqirdi. Hozir bu borada jamoatchilik fikri ikkiga bo‘lingan. Shanba-yakshanba kunlari Fransiya bo‘ylab ommaviy namoyishlar o‘tishi kutilyapti.