“Bola yolg‘on gapirgan” – maktabda noma’lum shaxslar berib ketgani aytilgan konfetni o‘quvchi o‘zi sotib olgani ma’lum bo‘ldi

Maktablar atrofida noma’lum shaxslar o‘quvchilarga xavfli shirinlik tarqatayotgani, shunday shirinlik sabab bir bola vafot etgani haqidagi xabar Bolalar ombudsmani tomonidan o‘rganilmoqda. Bu haqda Kun.uz’ga Bolalar ombudsmani matbuot xizmati xabar berdi.

Oltinko‘l tumani IIB tomonidan aniqlanishicha, Andijon viloyati Oltinko‘l tumanidagi 18-umumta’lim maktabining 3-sinf o‘quvchisi X.M. (2015 yilda tug‘ilgan o‘g‘il bola) mazkur hududda joylashgan savdo do‘konidan 1 000 so‘mga 3 dona “STRAWBERRY” nomli konfet sotib olgan. So‘ng maktabga kelgan vaqtida sinfdoshi O.A. undan shirinlikni qayerdan olganini so‘ragan. Bola shirinlikni unga go‘yoki notanish shaxs berib ketganini aytib, yolg‘on gapirgan.

Maktab hamshirasi O.A. bolaning gapidan xulosa qilib, ijtimoiy tarmoqlarga maktab atrofida notanish shaxslar o‘quvchilarga “STRAWBERRY” nomli shubhali konfet bergani haqidagi haqqoniy bo‘lmagan xabar tarqatgan.

Bolalar ombudsmani konfet iste’moli oqibatida bola vafot etgani to‘g‘risidagi xabar ham haqiqatga zidligini ma’lum qildi.

Qo‘shimcha qilinishicha, hozirda mazkur holat yuzasidan tergovga qadar tekshiruv olib borilmoqda. Konfet tarkibida inson sog‘lig‘iga zarar yetkazuvchi moddalar bor yoki yo‘qligini aniqlash maqsadida sud-kimyoviy ekspertiza tayinlangan.

Holat yuzasidan qo‘shimcha ma’lumot berilishi bildirildi.