Abu-Saxiy bozorida yong‘in chiqqani rad qilindi

Toshkent viloyatining Zangiota tumani hududidagi ochiq maydonda qurilish chiqindilari yongan. Yong‘in qisqa fursatda o‘chirilgan. Favqulodda vaziyatlar vazirligi ijtimoiy tarmoqlarda tarqalgan surat eski ekanini bildirib, Abu-Saxiy bozorida yong‘in chiqqanini rad etdi.

Foto: Ijtimoiy tarmoqlar

Ijtimoiy tarmoqlarda Abu-Saxiy bozorida yong‘in chiqqani haqidagi xabarlar tarqaldi. Favqulodda vaziyatlar vazirligi holatga oydinlik kiritdi.

Ma’lum qilinishicha, bugun, 19 mart kuni soat 10:00 da Zangiota tumani, Nurafshon mahallasi hududida joylashgan ochiq maydonda qurilish chiqindilari yonayotgani to‘g‘risida FVBga xabar tushgan. Shunga ko‘ra, 2 ta yong‘in-qutqaruv ekipaji soat 10:12 da hodisa joyiga yetib borgan. Yong‘in soat 10:17 da o‘rab olingan va soat 10:28 da o‘chirilgan.

Hodisa joyiga Toshkent viloyati FVB va tuman FVB rahbar xodimlari chiqqan. Yong‘in oqibatida tan jarohati olgan va vafot etganlar yo‘qligi bildirildi. Hozirda yong‘in sababi va moddiy zarar miqdori aniqlanmoqda.

Shuningdek, vazirlik ijtimoiy tarmoqlarda tarqalgan Abu-Saxiy bozorida yong‘in chiqqani haqidagi xabarlarda bir necha yil oldin sodir bo‘lgan yong‘in tasvirlangan videodan foydalanilganini ma’lum qildi.

Vazirlik fuqarolar va blogerlardan aholi orasida sarosima ko‘tarmaslik maqsadida noto‘g‘ri ma’lumotlar tarqatmaslikni so‘ragan.

#yong‘in #Zangiota tumani #Abu-Saxiy