Angrendagi ko‘mir konida «BelAZ» ag‘darilib ketdi. Haydovchi halok bo‘ldi

«O‘zbekko‘mir» AJ «Angren» ko‘mir konida sodir bo‘lgan ko‘ngilsiz hodisa to‘g‘risida ma’lumot berdi.

Qayd etilishicha, 5 mart kuni soat 10:15 larda «Angren» ko‘mir konida «BelAZ» rusumli avtoag‘dargich tog‘ jinslarini to‘kish vaqtida orqaga sirpanib, ag‘darilib ketgan va yong‘in ro‘y bergan.

«O‘zbekko‘mir» aksiyadorlik jamiyati o‘t o‘chiruvchilari voqea joyiga tezlik bilan yetib kelgan va yong‘in to‘liq o‘chirilgan.

Hodisa oqibatida og‘ir tan jarohati olgan haydovchi A.Ahmadjonovga korxona tibbiy bo‘lim xodimlari tomonidan birinchi yordam berilgan va u shoshilinch ravishda shahar markaziy shifoxonasiga yetkazilgan. Ammo ko‘rsatilgan tibbiy yordamga qaramay, haydovchi shifoxonada vafot etgan.

Hozirda ko‘mir konida ro‘y bergan hodisa yuzasidan huquqni muhofaza qilish idoralari tomonidan surishtiruv ishlari olib borilmoqda.