Ukraina prezidenti devoni rahbari Andriy Yermak AQSh prezidentining Ukraina va Rossiya bo‘yicha maxsus vakili Kit Kellog bilan telefon orqali suhbatda Kellogning Kiyevga bo‘lajak tashrifi mavzusiga to‘xtalib o‘tdi. Ukraina prezidenti devoni saytida 7 fevral, juma kuni xabar berilganidek, ushbu muloqot chog‘ida Yermak adolatli va barqaror tinchlikka erishish Kiyev uchun ustuvor vazifa ekanini ta’kidladi. «Shuningdek, frontdagi vaziyat va Ukraina tinch aholisining xavfsizligini ta’minlash masalalari ham muhokama qilindi. Xavfsizlik masalalari bo‘yicha Myunxen konferensiyasida bo‘lajak uchrashuvlarga alohida e’tibor qaratildi», — deya xabar beradi Ukraina prezidenti devonining matbuot xizmati. Andrey Yermak Rossiya agressiyasiga qarshi kurashda Ukrainani qo‘llab-quvvatlagani uchun AQShga minnatdorlik bildirdi.

Bir kun avval Ukraina prezidenti devoni Volodimir Zelenskiy Yevropa tiklanish va taraqqiyot banki (YeTTB) rahbari Odil Reno-Basso bilan uchrashuvda 14—16 fevral kunlari bo‘lib o‘tadigan Myunxen xavfsizlik konferensiyasida ishtirok etishni va Yevropadagi hamkorlari bilan Rossiyaning muzlatilgan aktivlari hajmini oshirish imkoniyatlarini muhokama qilishni rejalashtirayotganini ma’lum qilgan edi.

«Yevropadagi hamkorlar bilan gaplashaman, Myunxen konferensiyasi vaqtida uchrashaman, shunday dastur bo‘ladi. Gap o‘nlab milliardlar haqida ketyapti. Biz ularni odamlarga kvartira bilan yordam berish, yashash uchun joy topish uchun sarflagan bo‘lardik», deb tushuntirdi Zelenskiy.

Kellog: Trampning Ukraina bo‘yicha rejasi Myunxenda taqdim etilmaydi

AQSh prezidentining Ukraina va Rossiya bo‘yicha maxsus elchisi Kit Kellog, OAV xabarlaridan farqli o‘laroq, kelasi hafta Myunxen xalqaro xavfsizlik konferensiyasida Donald Trampning Rossiyaning Ukrainaga qarshi urushini tugatish rejasini taqdim etmasligini aytdi. General Kellogning so‘zlariga ko‘ra, rejani Trampning o‘zi taqdim etadi. «Biz unga tayyorlanishiga yordam beramiz, ammo bu keyingi hafta bo‘lmaydi», dedi Kellog 6 fevral kuni Nesmax.tv saytiga bergan intervyusida.

Uning qo‘shimcha qilishicha, u Yevropa yetakchilari bilan muzokaralar o‘tkazishni rejalashtirgan, shundan so‘ng bu suhbatlar mazmuni haqida AQSh prezidentini xabardor qiladi va Tramp jamoasi bu ma’lumotlardan kelib chiqadi.

Bir kun avval Bloomberg manbalariga tayanib, AQSh ittifoqchilari Kellog Trampning Ukrainadagi urushni tugatish rejasini 14-16 fevral kunlari bo‘lib o‘tadigan Myunxen xavfsizlik konferensiyasida taqdim etishini kutayotgani haqida xabar berdi.

Kellogning o‘zi o‘sha paytda Myunxen konferensiyasida ishtirok etishini va Trampning Ukrainadagi «qonli va qimmat» urushni tugatish maqsadi haqida gapirish uchun «imkoniyatni sabrsizlik bilan kutishini» aytdi.