AQSh Mudofaa vazirligi o‘z qo‘shinlarini Suriyadan to‘liq olib chiqib ketish rejalarini ishlab chiqmoqda. Bu haqda idoraning ikki vakiliga tayanib NBC News xabar berdi.

Qayd etilishicha, Pentagon xodimlari AQSh prezidenti Donald Tramp va unga yaqin bo‘lgan amaldorlar ushbu masalaga qiziqish bildirganidan keyin bu kabi rejalarni tayyorlashni boshlagan. Rejalarda qo‘shinlarni 30, 60 yoki 90 kun ichida olib chiqib ketish muddatlari ko‘rsatilgan.

NBC suhbatdoshlaridan birining aytishicha, Trampning milliy xavfsizlik bo‘yicha maslahatchisi Mayk Uols 31 yanvar kuni AQSh Markaziy qo‘mondonligi (CENTCOM) shtab-kvartirasida yuqori martabali amaldorlar bilan uchrashgan. Uchrashuvda Yaqin Sharqdagi vaziyat muhokama qilingan.

Oq uy rasmiy vakilining telekanalga ma’lum qilishicha, Suriyadagi Amerika kuchlarining potensial qisqartirilishi brifing yoki Uols tashrifining maqsadi bo‘lmagan. Pentagon bunga izoh berishdan bosh tortgan.

2019 yilda, Donald Tramp o‘zining birinchi prezidentlik muddati davrida Suriyadan AQSh qo‘shinlarining katta qismini olib chiqib ketgandi. Pentagon 2024 yil dekabr oyida ushbu mamlakatda 2 mingga yaqin amerikalik harbiy qolayotganini ma’lum qilgandi.

NBC’ning Pentagondagi manbalari ogohlantirishicha, Suriyadan Amerika qo‘shinlarining olib chiqib ketilishi «Suriya demokratik kuchlari»ni qo‘llab-quvvatlovdan mahrum qiladi va 50 mingdan ortiq mahbus saqlanayotgan qamoqxona hamda lagerlarni xavf ostida qoldiradi.