Xalqaro hokkey federatsiyasi (IIHF) kengashi Rossiya terma jamoasining jahon chempionatidagi ishtirokini to‘xtatib turish muddatini uzaytirdi va rossiyalik hokkeychilar 2026 yilda tashkilot shafeligida o‘tkaziladigan turnirlar dasturida ishtirok etmasligi haqida qaror qildi. Bu haqda 4 fevral, seshanba kuni Rossiya hokkey federatsiyasi ma’lumot berdi.
«4 fevral kuni Xalqaro hokkey federatsiyasi Ijroiya qo‘mitasining yig‘ilishi bo‘lib o‘tdi. Rossiya terma jamoasi 2026 yilgi jahon chempionatida ishtirok etmasligi haqida qaror qilindi», — deyiladi xabarda. IIHF Kengashi yig‘ilishi 2-4 fevral kunlari Shveytsariyada bo‘lib o‘tdi.
Hokkey bo‘yicha o‘smirlar va kattalar o‘rtasidagi jahon chempionati 2026 yilda o‘tkazilishi rejalashtirilgan.
Rossiya va Belarus terma jamoalari 2022 yil fevral oyidan boshlab Rossiyaning Ukrainaga keng ko‘lamli bostirib kirishi sababli IIHF turnirlarida qatnashishdan to‘xtadi. «Interfaks» agentligining ta’kidlashicha, 2023 yil oktyabr oyida tashkilot 2026 yilgi qishki Olimpiada o‘yinlarining guruh bosqichlari uchun dastlabki dasturni e’lon qildi, unda rossiyalik hokkeychilar «jamoani chempionat dasturiga qaytarish to‘g‘risida qaror qabul qilingan taqdirda nazariy saralash pozitsiyasi» yozuvi bilan C guruhiga kiritilgan. 2026 yilgi qishki Olimpiada o‘yinlari 6-22 fevral kunlari Milan va Kortina-d'Ampetsso shaharlarida bo‘lib o‘tishi rejalashtirilgan.
Rossiya hokkey federatsiyasi qaror ustidan shikoyat qiladi
Rossiya hokkey federatsiyasining xalqaro masalalar bo‘yicha maxsus vakili, taniqli sobiq hokkeychi Pavel Burening so‘zlariga ko‘ra, RHF Shveytsariyada qabul qilingan qarorga sud orqali e’tiroz bildiradi. "Hozir qanday qaror qabul qilinmasin, IIHF har qanday holatda ham terma jamoamizni qabul qilishi kerak, chunki Rossiyasiz jahon chempionatlari saviyasi ancha past. Biz bu qarorga sud orqali e’tiroz bildiramiz va har qanday holatda ham o‘z maqsadimizga erishamiz. Shuni ta’kidlashni istardimki, Rossiya terma jamoasining 2026 yilda Milanda bo‘lib o‘tadigan Olimpiada o‘yinlaridagi ishtiroki haqidagi qaror Xalqaro olimpiya qo‘mitasi tomonidan qabul qilinadi. NHLda esa 50 dan ortiq rossiyalik o‘ynaydi", — dedi Bure.
Rossiya Federatsiyasi 9-25 may kunlari Shvetsiya va Daniyada bo‘lib o‘tadigan, Rossiya ishtirok etmaydigan 2025 yilgi jahon chempionatidan keyin IIHF qaroriga e’tiroz bildirish huquqiga ega bo‘ladi. O‘z navbatida, Xalqaro hokkey federatsiyasi Ukrainadagi urush yakunlansa, qarorni qayta ko‘rib chiqish imkoniyatiga ega, deb eslatadi «Interfaks».
Burening so‘zlariga ko‘ra, IIHF takliflaridan biri «Rossiya jamoasi uchun qo‘shimcha xavfsizlikni moliyalashtirish» edi, chunki «jamoaga ruxsat bermaslik uchun IIHF argumentlaridan biri ishtirokchilarning xavfsizligi edi». U uch yil davomida federatsiya IIHF va «butun hokkey oilasi bilan Rossiya jamoasi xalqaro maydonga qaytishi uchun» faol ish olib borayotganini ta’kidladi.
