Kimdir oldi, kimdir esa yo‘q: “Uzbekistan Airways”ning bayram chegirmasi tanqidga uchradi. Kompaniya o‘zining 33 yillik yubileyi munosabati bilan kecha, ya’ni faqat bir kun barcha yo‘nalishdagi chiptalar uchun 30 foizlik chegirma e’lon qilgan edi. Ammo tarmoqlarda tarqalgan xabarlarga ko‘ra, 28 yanvar kirib kelishi bilan 30 foizlik chegirma qimmatlashtirib yuborilgan. 

Bu holat esa ko‘pchilikning e’tirozlariga sabab bo‘lgan. Kun.uz holatga aniqlik kiritish maqsadida “O‘zbekiston havo yo‘llari” markaziy kassasiga kelganlar bilan so‘rovnoma o‘tkazdi. Ayrimlar chiptalarni chegirma narxida olayotganliklarini aytishgan bo‘lsa, aksariyat fuqarolar e’lon qilingan 30 foizlik chegirmalarni chipta narxlarida sezmaganliklarini aytishdi. 

“Uzbekistan Airways” AJ matbuot kotibining fikrlariga ko‘ra, chiptalar butun dunyoda 24 soat davomida sotiladi. Kecha bir narxda sotilgan bo‘lsa, bugun boshqa narxda bo‘lishi tabiiy. Xaridlar natijasida arzon tariflar tugab, qimmatroq tarifdagi chiptalar sotuvga chiqariladi. Shundan so‘ng ayrim yo‘lovchilarga chegirmalar ko‘rinmaydi. 

“Bu tariflarning o‘ynab turishi bilan bog‘liq jarayon, tariflar sistemaga kiritilgan bo‘ladi va uni 1-2 kun ichida o‘zgartirish qiyin, xodimlar 2-3 oy oldin harakat qilishadi, shuning uchun ataylab narxlarni qimmatlashtirib sistemaga kirita olmaymiz” – deydi kompaniya matbuot kotibi.