Gold Star Jewellery Pvt. Ltd. kompaniyasi boshqaruvchi direktori Ashish Shoh bilan uchrashuv chog‘ida O‘zbekistonda so‘nggi yillarda hayotning barcha jabhalarida amalga oshirilayotgan yangilanish jarayoni, mamlakat iqtisodiyotining turli tarmoqlari, jumladan, zargarlik sanoatini rivojlanishning yangi bosqichiga olib chiqish bo‘yicha ko‘rilayotgan izchil sa’y-harakatlar haqida batafsil ma’lumot berildi.

Tomonlar O‘zbekiston va Gold Star Jewellery Pvt. Ltd. kompaniyasi o‘rtasida samarali hamkorlik aloqalarini yo‘lga qo‘yish va zargarlik buyumlarini ishlab chiqarish bo‘yicha qo‘shma loyihalarni amalga oshirish masalalari yuzasidan ham atroflicha fikr almashdi.

Sonani Industries Pvt. Ltd kompaniyasi raisi Manesh Sonani bilan muloqot doirasida hindistonlik sanoatchilarga O‘zbekistonda so‘nggi yillarda xorij ishbilarmon doiralari vakillari va sarmoyadorlari faoliyati uchun yaratilgan qulay va jozibador muhit, jumladan, zargarlik sohasini qo‘llab-quvvatlash va yanada rivojlantirish bo‘yicha ko‘rilayotgan tizimli chora-tadbirlar haqida so‘zlab berildi.

Tomonlar "O‘zbekzargarsanoati" uyushmasi va Sonani Industries Pvt. Ltd kompaniyasi o‘rtasida hamkorlik munosabatlarini o‘rnatish istiqbollari bilan bog‘liq masalalarni batafsil muhokama qildi.