“Kam bo‘lganimiz yo‘q”: qishda ham qulupnay va rediska yetishtirib sotayotgan quvalik dehqon

Otaxon Boboyev Quva tumanining Akbarobod qishlog‘idan. Hozir dehqonning qo‘li qo‘liga tegmaydigan vaqt. U tomorqasidagi issiqxonada yetishtirgan qulupnay va rediskadan yaxshigina daromad topyapti. Qulupnaylar kilogrammi 150 ming, bir bog‘ rediska esa 2500 so‘mdan sotilyapti.

{Yii::t(}

O'tkazib yuborish 6s

O'tkazib yuborish

Dehqon Otaxon aka yaxshi niyatda 20 sotix tomorqasiga issiqxona qurib, unga rediska urug‘ini qadagandi. Ayni paytda yetilgan rediskalar yig‘ishtirilyapti.

Mahallaning bir qancha ayollari ish bilan ta’minlangan. Qishda uyida ishsiz o‘tirgan ayollar dehqon issiqxonasida tushlikkacha rediska bog‘lab, kunlik haq olyapti.

Dehqon yig‘ishtirilgan rediskalarni bozorga olib chiqqani ham yo‘q, chunki xaridorlarning o‘zi kelib olib ketyapti. Ichida 7 dona bo‘lgan bir bog‘lam rediska 2 500 so‘mdan sotilyapti.

Bundan tashqari Otaxon Boboyev uyidagi 5 sotix issiqxonasiga qulupnay ekkan. Qulupnaylar 1 kilosi 150 ming so‘mdan sotilyapti.

“Qimirlagan qir oshar deyishadi. Qishloqda ham mehnat qilgan kam bo‘lgani yo‘q. Harakat qilgan yaxshi yashayapti. Issiqxonalardan yaxshigina daromad olyapmiz, qora qozon qaynayapti, Xudoga shukur. Mahalla ayollarini kunlik ishlatib, ish bilan ta’minlayapmiz. Chorvamiz bor. Sigir sog‘ib, sutini ro‘zg‘orga ishlatamiz, ortib qolganini sotamiz. Xullas, qishloq tinch, sokin, maza, asablar dam oladi”, — deydi quvalik dehqon.

Sarvar Ziyoyev, Kun.uz

Montaj ustasi: Sardor Mamirov