AQSh prezidenti Donald Tramp Rossiyaning Ukrainaga qarshi urushini tinch yo‘l bilan hal qilish bo‘yicha ishlar allaqachon boshlanganini aytdi. Bu haqda u 23 yanvar, payshanba kuni Davosda bo‘lib o‘tayotgan Jahon iqtisodiy forumida video-aloqa orqali nutq so‘zlaganida ma’lum qildi. Shu bilan birga, Tramp Rossiyaning Ukrainaga qarshi urushini davom ettirishiga neft narxining hozirgi yuqori darajasi yordam bermoqda, degan fikrni bildirdi. U janglarni tezroq yakunlash uchun ularni qisqartirishga chaqirdi.

«Men Saudiya Arabistoni va OPEKdan neft narxini pasaytirishni so‘rayman. Uni tushirish kerak! Agar narx tushib qolsa, Rossiya va Ukraina o‘rtasidagi urush darhol tugaydi», — deya ta’kidladi AQSh prezidenti.

Hozirda neft narxi bir barrel uchun 80 dollar atrofida. Tramp nutqi davomida uning qiymati deyarli bir dollarga tushib ketdi.

Putin bilan uchrashuv

Tramp, shuningdek, Ukrainadagi urushni tugatish uchun yaqin vaqt ichida Rossiya prezidenti Vladimir Putin bilan uchrashishni istashini aytdi. «Men bu urushni tugatish uchun prezident Putin bilan tez orada uchrashishni juda xohlardim. Va bu iqtisod yoki boshqa narsa nuqtayi nazaridan emas. Bu millionlab odamlarning hayoti nuqtayi nazaridan muhim», — deya tushuntirdi u.

Trampdan keyingi yilgi sammitda yana nutq so‘zlagunga qadar Rossiya va Ukraina tinchlik kelishuviga erishishiga ishonasizmi, deb so‘raldi. «Bu haqda Rossiyadan so‘rashingiz kerak, Ukraina kelishuvga tayyor», deb javob berdi AQSh prezidenti. U Kiyev va Moskva o‘rtasidagi ehtimoliy muzokaralar haqida batafsil ma’lumot bermadi.

AQSh prezidenti Xitoy mamlakatga Rossiyaning Ukrainaga qarshi urushini to‘xtatishga yordam berishiga umid bildirdi. Uning so‘zlariga ko‘ra, Pekin va Vashington o‘rtasidagi munosabatlar «juda yaxshi». «Xitoy Rossiyaga urushni zudlik bilan tugatish uchun ta’sir qilishga yetarli kuchga ega. Biz buni Xitoy bilan birga qilamiz», — dedi Tramp.