AQSh prezidenti Donald Tramp Rossiya prezidenti Vladimir Putinni Ukrainadagi urushni to‘xtatishga chaqirdi. Bu haqda u o‘ziga tegishli Truth Social ijtimoiy tarmog‘ida murojaat qildi.

«Men Rossiyaga zarar yetkazishni xohlamayman. Men rossiyaliklarni yaxshi ko‘raman va har doim prezident Putin bilan juda yaxshi munosabatda bo‘lganman… Biz hech qachon unutmasligimiz kerakki, Rossiya Ikkinchi Jahon urushida g‘alaba qozonishimizga yordam berdi va bu jarayonda qariyb 60 million kishini yo‘qotdi… Men iqtisodiyoti inqirozga uchrayotgan Rossiyaga va prezident Putinga juda katta yordam bermoqchiman. Endi tinchlaning va bu bema’ni urushni to‘xtating! Vaziyat tobora yomonlashaveradi», deb yozdi Tramp.

AQSh prezidenti agar urush to‘xtatilmasa, rossiyalik hamkasbiga turli sanksiyalar bilan tahdid qildi.

«Agar biz «kelishuv»ni tezda tuza olmasak, Rossiya tomonidan AQSh va boshqa davlatlarga sotilayotgan barcha narsaga yuqori soliqlar, bojlar va sanksiyalar kiritishdan boshqa choram qolmaydi. Agar prezident bo‘lganimda, bu urush hech qachon boshlanmas edi, keling bu urushni to‘xtataylik! Biz buni oson yoki qiyin yo‘l bilan qila olamiz va oson yo‘l har doim yaxshiroq. «Bitim tuzish» vaqti keldi. Endi hech bir hayot yo‘qotilmasligi kerak!», deb yozdi Tramp.

Donald Tramp saylovoldi tashviqotida agar prezident bo‘lsa, Ukrainadagi urushni bir kunda to‘xtatishi haqida juda ko‘p bayonot bergan edi.